გირჩის რელიგიურმა ორგანიზაციამ დღეისთვის უკვე 600 მღვდელმსახური აკურთხა. ინფორმაციას ბიბლიური თავისუფლება თავის ფეისბუკის გვერდზე ავრცელებს:

"დიდი დღეა! უკვე ექვსასი ახალგაზრდა დაუბრუნდა ეკლესიის წიაღს! ბიბლიური თავისუფლებაში მეექვსასე მღვდელმსახური ვაკურთხეთ - უკვე მეექვსასედ ვიხილეთ ბიუროკრატიის კლანჭებისგან ადამიანის დახსნის ხილული სასწაული!"

გირჩის მიერ რელიგიური ორგანიზაციის დაფუძნების შესახებ ინფორმაცია On.ge-მ 21 აპრილს გაავრცელა. გირჩის წევრებმა 2017 წლის მარტში დააფუძნეს რელიგიური ორგანიზაცია, რომელიც სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი, შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.