თბილისის ტრანსპორტის საქალაქო სამსახურის უფროსი მამუკა მუმლაძე კვირის პალიტრასთან ინტერვიუში ამბობს, რომ თბილისში შემოვლითი რკინიგზის პროექტის განხორციელების შემთხვევაში, მიწისზედა მეტრო ან ტრამვაის ხაზი ამუშავდება.

მუმლაძის თქმით, რუსთავიდან თბილისში და პირიქით, დღეში 20 ათასამდე კაცი გადაადგილდება და მგზავრთა ნაკადს 300 მიკროავტობუსი ემსახურება.

ტრანსპორტის სამსახურის უფროსი ამბობს, რომ რკინიგზის გადატანის შემთხვევაში, გათავისუფლდება სივრცე, რომელიც შესაძლებლობას იძლევა, თბილისი მიწისზედა სალიანდაგო ტრანსპორტით რუსთავს დაუკავშირდეს:

"არსებული სალიანდაგო ხაზი რუსთავის მახლობლად მდებარე სოფელ ყარაჯალამდე ჩადის და იქიდან ძალიან პატარა მონაკვეთია, რომლის დაკავშირება რუსთავთან, ფაქტობრივად, ერთი ხიდით შეიძლება და მიწისზედა მეტრო ან ტრამვაი თბილისიდან რუსთავამდე ჩავა".

მუმლაძის განცხადებით, სატრანსპორტო ჰაბი შესაძლებელია სამგორის მეტროსთან გაკეთდეს:

"აქ მგზავრი ამოვა მეტროდან და შესაძლებლობა ექნება, ჩქაროსნული მიწისზედა ტრანსპორტით წავიდეს ისთ პოინტამდე, ლილომდე და ასევე, რუსთავამდე. მიდის მუშაობა საბაგირო ტრანსპორტის განვითარებაზე. სამგორსა და ვაზისუბანში იყო სამგზავრო ტიპის საბაგირო გონდოლები, 22-25 კაცზე გათვლილი. ახლა გრანტის ფარგლებში გაკეთდება პროექტი და ზემოხსენებული ჰაბიდან შესაძლებელი იქნება ვაზისუბანში ან თბილისის ზღვამდე საბაგიროთი მგზავრობა".

მუმლაძის თქმით, ქალაქის განტვირთვის ლაგუნა ვერესთან, შესაძლოა, ბენზინგასამართი სადგურები აიღონ.