რატომ არის მნიშვნელოვანი: პროდასავლური პარტიები ეხმაურებიან რუსეთის მიერ სავიზო რეჟიმის გაუქმებას, ფრენების აღდგენას და ამ საკითხზე ქართული ოცნების წარმომადგენლების შეფასებებს.

• განცხადებაში ისინი ხაზს უსვამენ, რომ ქართულმა ოცნებამ ევროპული და ევროატლანტიკური მომავალი, კიდევ ერთხელ, მნიშვნელოვანი დარტყმის ქვეშ დააყენა და საერთაშორისო იზოლაციისა და ოკუპანტი რუსეთის გავლენის სივრცეში დატოვების რეალური საფრთხე შექმნა, რითაც პირდაპირ გაზარდა მტრის ხელახალი თავდასხმისა და აგრესიის რისკები.
• ამბობენ იმასაც, რომ საქართველოს მთავრობა ცრუობს, თითქოს, პუტინის რეჟიმთან ერთად, ფრენების აღდგენის გადაწყვეტილება ეკონომიკისა და რუსეთში მცხოვრები თანამემამულეების სამშობლოსთან კავშირის გასაძლიერებლად მიიღო.
• მათი შეფასებით, ეს სულაც არ არის უანგარო და უწყინარი გადაწყვეტილება, როგორადაც ამას ხელისუფლების პროპაგანდა წარმოაჩენს და მმართველმა გუნდმა საგარეო-პოლიტიკური კურსის ცვლილებისა და რუსული ავტორიტარიზმის დამყარების ფინალური ეტაპი დაიწყო.

პარტიები მიმოიხილავენ ქართული ოცნების განცხადებებსა და გადაწყვეტილებებსაც, რომლებიც პროდასავლურ კურსს აზიანებს.

• "მხოლოდ მიმდინარე თვის განმავლობაში, საქართველოს ხელისუფლებამ უარი განაცხადა ნატო-ს სწავლება მცველი 2023-ში მონაწილეობაზე, თავს დაესხა ამერიკის საერთაშორისო რესპუბლიკურ ინსტიტუტსა (IRI) და ამერიკის ეროვნულ-დემოკრატიულ ინსტიტუტს (NDI), დატოვა სიდიდით მეორე ევროპული პოლიტიკური ოჯახი, თანხმობა განაცხადა რუსეთთან პირდაპირ საჰაერო მიმოსვლაზე. საქართველო საერთაშორისო იზოლაციისა და მტერთან — რუსეთთან მოკავშირეების გარეშე დარჩენის ზღვარზეა", — ვკითხულობთ განცხადებაში.
• აღნიშნულია ისიც, რომ საქართველოს მთავრობა კიდევ ერთხელ უპირისპირდება საკუთარი, ჩვენი და მთელი ცივილიზებული სამყაროს თავისუფლებისთვის მებრძოლ უკრაინას.
• "ჩვენი ქვეყნისთვის გადამწყვეტ მომენტში, მაშინ, როდესაც საქართველოს ევროპული და ევროატლანტიკური მომავალი ასეთი რეალურია, ივანიშვილი კიდევ ერთხელ გვიყენებს საკითხს: ევროპა, თუ რუსეთი? მშვიდობა, კეთილდღეობა და დაცულობა ერთიან ევროპულ ოჯახში, თუ სიღარიბე, მონობა და უპერსპექტივობა დამარცხებულ რუსეთთან ერთად?", — აცხადებენ პარტიები.
• მათი აზრით, საქართველოს საზოგადოებამ კიდევ ერთხელ, ერთიანად, მკაფიოდ და ხმამაღლა უნდა თქვას: "არა მტერთან კოლაბორაციას, არა რუსულ მთავრობას, ერთად ევროპისკენ!"
• პარტიები ამბობენ, რომ გააკეთებენ ყველაფერს, ამ რეჟიმის დემოკრატიულად შესაცვლელად, საქართველოს საერთაშორისო იზოლაციისა და რუსეთის მიერ თავისუფლებისა და სახელმწიფო სუვერენიტეტის ხელყოფისაგან დასაცავად, იმისთვის, რომ ისტორიის გზაგასაყარზე მყოფი ქვეყანა შეუქცევადად დაადგეს დეოკუპაციის, ევროკავშირსა და ნატოში მიმავალ გზას.

ხელმოწერები: განცხადებას 7 ოპოზიციური პარტია ავრცელებს.

• გირჩი — მეტი თავისუფლება;
• ელენე ხოშტარია — დროა;
• ლელო საქართველოსთვის;
• სტრატეგია აღმაშენებელი;
• ერთიანი ნაციონალური მოძრაობა;
• ევროპული საქართველო;
• კანონი და სამართალი.