საქართველოს პრეზიდენტმა სტრასბურგსა და ბრიუსელში სამუშაო ვიზიტი დაიწყო. სტრასბურგში დაგეგმილ დღევანდელ შეხვედრაზე განიხილება საქართველოსთვის უვიზო რეჟიმის მინიჭების, საქართველოს საპარლამენტო არჩევნებისა და ვარშავის სამიტისთვის მზადების საკითხები.

ვიზიტის დაწყების წინ, პრეზიდენტის საერთაშორისო ურთიერთობათა მდივანმა თენგიზ ფხალაძემ განაცხადა, რომ აღნიშნულ საკითხებთან დაკავშირებით ევროკავშირის წარმომადგენლებთან მუშაობა მნიშვნელოვანია.

"საქართველოს შესრულებული აქვს ყველა ის მოთხოვნა, რაც გათვალისწინებული იყო სავიზო რეჟიმის ლიბერალიზაციის სამოქმედო გეგმით. განიხილება აღნიშნული საკითხი და ძალიან ახლოს ვართ პოლიტიკურ გადაწყვეტილებასთან".

ფხალაძემ დასძინა, რომ გასათვალისწინებელია ევროკავშირის ფონი, რომელიც მას ლტოლვილებთან დაკავშირებით აქვს.

დღეს, სტრასბურგში, გიორგი მარგველაშვილი ევროპის საბჭოს გენერალურ მდივანს ტორბიორნ იაგლანდს, ევროპის სახალხო პარტიის ლიდერებს შეხვდება. პრეზიდენტის ადმინისტრაციის ინფორმაციით, ის ევროპის პარლამენტის საგარეო ურთიერთობათა კომიტეტის სხდომაზე სიტყვით გამოვა და ევროპარლამენტარების შეკითხვებსაც უპასუხებს.