ჟურნალისტ შალვა რამიშვილის გადაცემა საზოგადოებრივ მაუწყებელზე არ გავა. ამის შესახებ On.ge-ს საზოგადოებრივი მაუწყებლის სტრატეგიული განვითარების სამსახურის უფროსმა, ია ანთაძემ განუცხადა.

რამიშვილმა საზოგადოებრივი მაუწყებლის გადაცემების შესარჩევი კომისიის წევრებისგან ხმების საჭირო რაოდენობა ვერ მიიღო. კომისიის წევრების გადაწყვეტილების შესახებ რამდენიმე საათის წინ გახდა ცნობილი.

რამიშვილის გადაცემა შეფასებებით ვერც კონკურსის მესამე ეტაპზე ხვდებოდა, თუმცა, კომისიის რამდენიმე წევრის რეკომენდაციითა და გენერალური დირექტორის გადაწყვეტილებით საპილოტე ვერსია მაინც დაამზადა.

დღესვე ცნობილი გახდა იმ გადაცემების ჩამონათვალი, რომელიც გენერალურ დირექტორს დასამტკიცებლად გადაეგზავნა.

კონკურსის ფარგლებში, მაუწყებელში, სულ 153 პროექტი შევიდა. საკონკურსო კომისია, რომელმაც გადაცემები შეარჩია ასე იყო დაკომპლექტებული:

  • დრამატურგი - თამარ ბართაია;
  • სოციოლოგი - იაგო კაჭკაჭიშვილი;
  • მედიაკრიტიკოსი - დავით ბუხრიკიძე;
  • სცენარისტი, რეჟისორი - სოფო ბაბლუანი;
  • წარმოებისა და ტექნიკური უზრუნველყოფის ბლოკის დირექტორი - თეო მაზმიშვილი;
  • სატელევიზიო არხების ხელმძღვანელი - რუსუდან მანჯგალაძე;
  • დოკუმენტური ფილმების სტუდიის ხელმძღვანელი - კოტე ჯანდიერი;
  • წარმოების დეპარტამენტის უფროსი - თემურ გოგოლაძე;
  • ვიზუალური გაფორმების სამსახურის უფროსი - კახაბერ ბუხრაშვილი;
  • კვლევისა და ანალიტიკის სამსახურის სოციოლოგი - რუსუდან ახვლედიანი;
  • ონლაინ მედია ხელმძღვანელი - თამარ კაციტაძე.