ტელეკომპანია რუსთავი 2-ის ინფორმაციით, თბილისიდან გატაცებული პირი სამშენებლო კომპანია სვეტის დამფუძნებელი, გივი ჯიბლაძეა. ჯიბლაძეს ფიზიკური ანგარიშსწორების მუქარით თანხას სძალავდნენ. ოთხი გამტაცებელი სამართალდამცავებმა სპეცოპერაციის შედეგად დააკავეს.

"როცა მივედი სადარბაზოსთან გაიღო კარი და გადმოვიდა ოთხი პირი, წამიყვანეს. იქ ფიზიკურად ვერ დავინახე ვინ იყვნენ. მივედით მერე ერთ-ერთ ავტოსადგომზე, სადაც უკვე წავიდა საუბარი. მე მეშოკი მქონდა თავზე და მერე უკვე გადამხსნეს," - ყვება რუსთავი 2-თან ჯიბლაძე.

ტელეკომპანია რუსთავი 2 ჯიბლაძეზე დაყრდნობით ავრცელებს ინფორმაციას, რომ გატაცებას წინ უძღვოდა დაპირისპირება მოქანდაკე ზურაბ წერეთლის კომპანიის წარმომადგენლებთან. თუმცა, განმარტებულია, რომ წერეთელს კავშირი არ ჰქონია.

გუშინ, 12 ივნისს თბილისში, აღმაშენებლის ხეივანში, მოსამართლის განჩინების საფუძველზე, ცენტრალურმა კრიმინალურმა პოლიციამ ოთხი პირი დააკავა. შემთხვევის შედეგად ამ ტერიტორიაზე გარკვეული პერიოდით შეფერხებული იყო საავტომობილო მოძრაობა.

შინაგან საქმეთა სამინისტროს ცნობით, გამოძიება სსკ-ის 143-ე და 181-ე მუხლებით მიმდინარეობს, რაც თავისუფლების უკანონო აღკვეთასა და გამოძალვას გულისხმობს.