უვე ცნობილია 11 ივნისს, საფრანგეთში ნაციონალური ასამბლეის (პარლამენტის ქვედა პალატა) არჩევნების პირველი ტურის შედეგები, რომლის შედეგად ახლადარჩეული პრეზიდენტის, ემანუელ მაკრონის პარტია La Republique En Marche ლიდერობს. ჯამურად, მაკრონის პარტიის კანდიდატებმა მთელი ქვეყნის მაშტაბით ხმების 28,21 პროცენტი მიიღეს, ანუ 6,39 მლნ ხმა, ასევე მაკრონის პარტიის მოკავშირეებმა, დემოკრატიული მოძრაობიდან, მიიღეს ხმების 4,11 პროცენტი, რაც მილიონს აღწევს. ამგვარად, მაკრონის მოძრაობამ, ჯამურად, ხმების 32,32 პროცენტი მიიღო. მეორე ადგილზე გავიდა საფრანგეთის რესპუბლიკური პარტია - 15,77 პროცენტი, რესპუბლიკურ პარტიას მოსდევს მარინ ლე პენის ნაციონალური ფრონტი - 13,20 პროცენტი, ასევე ბარიერი დაძლია ჟან ლუკ მელონშონის პარტიამ - 11,02 პრიცენტი. ამ არჩევნებზე თავისი ისტორიული მინიმუმი დააფიქსირა საფრანგეთის სოციალისტურმა პარტიამ - 7,44 პროცენტი.

ნაციონალური ასამბლეა საფრანგეთი პარლამენტის ქვედა პალატას წარმოადგენს და არჩევნები მაჟორიტარული სისტემით ტარდება. საფრანგეთში სულ 577 ერთმანდატიანი ოლქია, სადაც კანდიდატები ცდილობენ ხმათა უმრავლესობა მოიპოვონ. პირველ ტურში გასამარჯვებლად აუცილებელია ხმათა უმრავლესობის აღება. ოლქების უმრავლესობაში ჯერჯერობით არ არის გამოვლენილი გამარჯვებული, გამარჯვებული კანდიდატები 18 ივნისს მეორე ტურში შემდეგ გახდება ცნობილი. მოსალოდნელია, რომ ჯამურად, მაკრონის პარტია სადეპუტატო ადგილების დაახლოებით 70 პროცენტს მიიღებს.

წლევანდელი საპარლამენტო არჩევნები გამოირჩეოდა რეკორდულად დაბალი აქტივობით, რომელიც 48,71 პროცენტი იყო. არჩევნები უპრეცენდენტოა კიდევ ერთი კუთხით: შეგახსენებთ, რომ პირველი ტურში გამარჯვებული მაკრონის პარტია 2016 წლის 6 მაისს დაარსდა და იგი ამჟამად პარლამენტში წარმოდგენილი არ არის. ასევე რეკორდულად მაღალი იყო პარტიის მხრიდან ქალი კანდიდატების რაოდენობა. ჯამში, მაკრონის პარტიამ 266 ქალი კანდიდატი წარადგინა. საფრანგეთში იზრდება უმუშევრობა, ქვეყანა განიცდის ეკონომიკურ სტაგნაციას, ასევე მნიშვნელოვანია მიგრაციის საკითხიც, არსებული მძიმე პოლიტიკური და ეკონომიკური გამოწვევების ფონზე, მაკრონის პარტიისთვის უკიდურესად მნიშვნელოვანია მყარი უმრავლესობის მოპოვება.