უჩა ნანუაშვილი მიიჩნევს, რომ ე.წ. ციანიდის საქმეზე სასამართლო სხდომაზე არ დაშვებით მისი, როგორც სახალხო დამცველის უფლებები შეიზღუდა. მან ამის შესახებ იმ წერილში აღნიშნა, რომელიც ამ საქმის განმხილველ მოსამართლეს, ბესიკ ბუგიანიშვილს მიწერა. ამავე წერილში ნანუაშვილმა აღნიშნა, რომ მას სჯერა, რომ შემდეგ სასამართლო სხდომაზე დასწრების უფლება არ შეეზღუდება.

"ვერ გავიზიარებ არგუმენტს იმასთან დაკავშირებით, რომ ქართული კანონმდებლობა, კერძოდ კი – საქართველოს სისხლის სამართლის საპროცესო კოდექსი სახელდებით არ იცნობს ნორმას დახურულ პროცესზე სახალხო დამცველის დასწრების შესახებ," - აღნიშნავს ნანუაშვილი მოსამართლისთვის მიწერილ წერილში.

სახალხო დამცველი აღნშნავს, რომ სასამართლო პროცესზე მისი დასწრებით გამორიცხულია პროცესის მონაწილეთა პერსონალური მონაცემების, პირადი ცხოვრებისა და უსაფრთხოების დაცვის საჯარო ინტერესის უგულებელყოფა. გარდა ამისა, ნანუაშვილი იმ სამართლებრივ ნორმებს იმოწმებს, რომლითაც მიაჩნია, რომ მას მსგავს სხოდმებზე დასწრების უფლება აქვს.

30 მაისს ე.წ. ციანიდის საქმის განმხილველ სხდომაზე სახლხო დამცველი არ შეუშვეს. საქალაქო სასამართლოს განცხადებით, მომდევნო სხდომისათვის სახალხო დამცველმა და მხარეებმა სასამართლოს უნდა წარუდგინონ არგუმენტირებული და სამართლებრივად დასაბუთებული შუამდგომლობა სახალხო დამცველის დახურულ სასამართლო სხდომაზე დასწრების შესაძლებლობასთან დაკავშირებით.

19 მაისს, სასამართლოში მამალაძის საქმის განხილვა სრულად დაიხურა. სხდომის დახურვის მიზეზი პერსონალური მონაცემების, პირადი ცხოვრებისა და პროცესის მონაწილის უსაფრთხოების დაცვა დასახელდა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.