სტუდია მონიტორის ხელმძღვანელმა, ჟურნალისტმა ნინო ზურიაშვილმა, აქტივისტებთან ერთად ამერიკის ელჩთან და საქართველოში ევროკავშირის წარმომადგენლობასთან შეხვედრა მოითხოვა.

აფგან მუხტარლის მხარდასაჭერად პარლამენტთან გამართულ მორიგ აქციაზე ზურიაშვილმა განაცხადა, რომ მათთვის უმნიშვნელოვანია ელჩებისგან მხარდაჭერის მიღება, რადგან იგივეს ვერ იღებენ საქართველოს ხელისუფლებისგან:

"ჩვენი ხელისუფლების წევრები, ერთმანეთზე უარეს განცხადებას ავრცელებენ და ფაქტობრივად ერთი-ერთზე იმეორებენ აზერბაიჯანის ხელისუფლების პოზიციას. არანაირი განსხვავება მათ შორის არ არის. ესაა ყველაზე სამწუხარო და სამარცხვინო ჩემი აზრით. ამიტომ ჩვენ არ გავჩერდებით და ბრძოლის ერთ-ერთი გზა ესეცაა, რომ ჩვენი გასაჭირი მივიტანოთ საელჩოებამდე და ამას გავაკეთებთ".

ზურიაშვილის თქმით, აქტივისტები ელჩებს, სავარაუდოდ, ორშაბათს შეხვდებიან.

აქტივისტები პარლამენტის თავჯდომარესთან შეხვედრასაც ითხოვენ, თუმცა მათ კობახიძისგან პასუხი ჯერ არ მიუღიათ.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.