7 წლის იამატო ტენუკა, რომელიც 28 მაისს თავისმა მშობლებმა ტყეში დასჯის მიზნით დატოვეს, ნაპოვნია.

ბიჭი უვნებელია, თუ არ ჩავთვლით თითქმის 1 კვირის შიმშილსა და მის დეჰიდრატაციას, იუწყება CNN.

ტენუკა მშობლების მიერ დატოვებული ადგილიდან 6 კილომეტრში, მიტოვებულ შენობაში, პარასკევ დილით იპოვეს. როგორც ბიჭმა პოლიციას განუცხადა, მან იმ ღამესვე იპოვა აღნიშნული ადგილი და თავი შეაფარა.

იამატო ტენუკას თავშესაფარი

ფოტო: AP

ტყეში, სადაც 7 წლის ბიჭი დატოვეს, ველური დათვები ბინადრობენ. მისი დაკარგვის ღამეს კი იაპონიაში ძლიერი ძლიერი შტორმი იყო, რაც კიდევ უფრო ართულებდა ბავშვის ან მისი კვალის პოვნას.

ტენუკას ძებნაში მოქალაქეებისა და სასწრაფო სამაშველო სამსახურის გარდა სამხედრო ძალაც იყო ჩართული.

ტყე, სადაც 6 დღის განმავლობაში 7 წლის ბიჭს ეძებდნენ

ფოტო: Hokkaido prefectural police

იამატო ტენუკა მშობლებმა ჰოკაიდოს მიმდებარედ ტყეში დასჯის მიზნით 28 მაისს დატოვეს. თავდაპირველად, მშობლებმა პოლიციას უთხრეს, რომ შვილი შემთხვევით დაეკარგათ, თუმცა კვირას, 29 მაისს, მათ აღიარეს, რომ ის რამდენიმე წუთით დატოვეს ტყეში, რათა "წესრიგი ესწავლებინათ" და როცა დაბრუნდნენ, ის იქ აღარ დახვდათ.

ბიჭის მამამ ადგილობრივ გაზეთს უთხრა, რომ მისი შვილი მანქანებსა და ადამიანებს პარკში სტუმრობისას ქვებს ესროდა, რის გამოც ჩათვალა, რომ მის მიმართ სიმკაცრის გამოჩენა აუცილებელი იყო, ამიტომ ის ტყეში წაიყვანა და აიძულა მანქანიდან გადასულიყო:

"მინდოდა შემეშინებინა და ასე დამესაჯა".

მან ასევე უთხრა ადგილობრივ ტელევიზიას, რომ თავდაპირველად როდესაც ძებნაში დახმარება მოითხოვა, შვილის დაკარგვის ნამდვილი მიზეზის გამხელის შეეშინდა.