რუსეთის პრეზიდენტის განცხადებით, გეგმის მიხედვით 300 000 ადამიანის გაწვევა იყო განსაზღვრული, მაგრამ მოხალისეების ჩათვლით, 318 000 მობილიზდა.

რატომ არის მნიშვნელოვანი: ვლადიმერ პუტინმა ნაწილობრივი მობილიზაცია 21 სექტემბერს გამოაცხადა.

  • პროცესი მნიშვნელოვანი დარღვევებით მიმდინარეობდა, რაც არაერთხელ გაშუქდა საერთაშორისო მედიაში.
  • რუსეთის სამხედრო სარდლობას მობილიზებულების მატერიალურ უზრუნველყოფასთან დაკავშირებით პრობლემები აქვს, რუსი სამხედროები ცუდი აღჭურვილობით გამოირჩევიან და ძირითადად აკლიათ სამხედრო ტანსაცმელი და ფეხსაცმელი.

  • რუსეთში, ჩუვაშიდან მობილიზებულებმა აქცია გამართეს და ის თანხები მოითხოვეს, რასაც ომში წასვლის სანაცვლოდ აღრიცხვისა და გაწვევის ოფისებში დაჰპირდნენ.

დეტალები: პუტინის მტკიცებით, 49 000 მობილიზებული "უკვე ასრულებს სამხედრო დავალებებს," დანარჩენებს კი "წვრთნიან".

  • მანამდე რუსეთის ფედერაციის თავდაცვის მინისტრმა განაცხადა, რომ ფრონტზე უფრო მეტი, 87 ათასი ადამიანია გაგზავნილი.
  • "300 000 მობილიზებულიდან უკვე 318 000 გვყავს. რატომ 318? იმიტომ რომ მოხალისეები მოდიან. მოხალისეების რაოდენობა არ მცირდება", — განაცხადა პუტინმა წითელ მოედანზე ეროვნული ერთიანობის დღესთან მიძღვნილ ღონისძიებაზე.

პარალელურად: მობილიზაციის დაწყების დღიდან, რუსეთში პანიკაა და მობილიზების პოტენციური მსხვერპლები სხვადასხვა მიმართულებით გარბიან.

  • ომის დაწყების შემდეგ საქართველოში რუსეთისა და ბელარუსის ათასობით მოქალაქე შემოვიდა და დარჩა.
  • პოლონეთი და ფინეთი რუსეთის საზღვარზე კედლის აშენებას აპირებენ — ერთ-ერთი მიზეზი რუსეთიდან უკანონო მიგრაციაა.