სახალხო დამცველი მოუწოდებს საქართველოს მხარის შესაბამის ორგანოებს, დაკავებული მუსტაფა ემრე ჩაბუქის თურქეთის რესპუბლიკაში ექსტრადიციის საკითხის განხილვისას შეისწავლოს დაკავებული ბრალდებულების მიმართ თურქეთის რესპუბლიკაში შესაძლო არასათანადო მოპყრობის რისკები.

ომბუდსმენის განცხადებით ქართულმა მხარემ, გადაწყვეტილების მიღებისას უნდა იხელმძღვანელოს ადამიანის უფლებათა ევროპული სასამართლოს მიერ დადგენილი სტანდარტებით, რათა მუსტაფა ემრე ჩაბუქის მიმართ ადგილი არ ჰქონდეს ადამიანის უფლებათა და ძირითად თავისუფლებათა დაცვის ევროპული კონვენციის მე-3 მუხლის დარღვევას.

სახალხო დამცველი წერს, რომ მათმა წარმომადგენელმა დაკავებული მოინახულა. მათივე ინფორმაციით, მუსტაფა ემრე ჩაბუქი აცხადებს, რომ თურქეთის რესპუბლიკაში ექსტრადიციის შემთხვევაში მას აწამებენ, ვინაიდან, თურქეთის რესპუბლიკის ხელისუფლება მას რესპუბლიკის პრეზიდენტის და ხელისუფლების მოწინააღმდეგედ მიიჩნევს.

2017 წლის 25 მაისს საქართველოს სამართალდამცავმა ორგანოებმა თურქეთის რესპუბლიკის შესაბამისი ორგანოების მოთხოვნის საფუძველზე, თბილისში დააკავა მუსტაფა ემრე ჩაბუქი. მას სამი თვის ვადით საექსტრადიციო პატიმრობა შეეფარდა.