თბილისის საქალაქო სასამართლომ ვაკეში მომხდარი მკვლელობის საქმეზე, ბრალდებულს 19 წლით თავისუფლების აღკვეთა მიუსაჯა.

წარდგენილი ბრალის თანახმად, ბადრი ნათენაძეს ბრალად ედებოდა ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარება, ასევე განზრახ მკვლელობის მცდელობა ორი ან მეტი პირის მიმართ და განზრახ მკვლელობა. მასვე, ბრალად ედებოდა ნარკოტიკული საშუალების უკანონოდ მოხმარება, ჩადენილი ამ დანაშაულისათვის ნასამართლევი პირის მიერ.

საქმე ეხება, 2016 წლის 2 სექტემბერს მომხდარ შემთხვევას, როდესაც თაქთაქიშვილის ქუჩაზე თავდამსხმელმა გაჩერებულ ავტომობილში მჯდომ მამაკაცს ესროლა. სროლის შედეგად, მძიმედ დაიჭრა ავტომობილში მჯდომი კიდევ ერთი პირი, ზაქარია ჩიბუხაშვილი, ხოლო საჭესთან მჯდომი სოსო ჯოხაძე მრავლობითი, ცეცხლნასროლი ჭრილობებით ადგილზე გარდაიცვალა.

საქალაქო სასამართლოს ინფორმაციით, ღია სასამართლო სხდომებზე, წარდგენილი ბრალი ბადრი ნათენაძემ ნაწილობრივ აღიარა, თუმცა არ დაეთანხმა ჩიბუხაშვილის მიმართ მკვლელობის განზრახვის ბრალდებას.

"სასამართლომ მოისმინა მხარეთა ახსნა-განმარტებები და სხდომებზე გამოკვლეულ მტკიცებულებათა ერთობლიობით დადგენილად მიიჩნია ბადრი ნ.-ს მხრიდან ბრალად შერაცხული დანაშაულების ჩადენის ფაქტები. შესაბამისად, სასჯელთა ნაწილობრივ შეკრების, შთანთქმის პრინციპის გამოყენებითა და დანაშაულთა ერთობლიობით, საბოლოოდ ბრალდებულს სასჯელის სახედ და ზომად 19 წლის ვადით თავისუფლების აღკვეთა განესაზღვრა" - აცხადებს თბილისის საქალაქო სასამართლო.

განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში.