სასამართლოში ციანიდის საქმის განხილვა სრულად დაიხურა. გადაწყვეტილება რამდენიმე წუთის წინ საქმის განმხილველმა მოსამართლემ ბესიკ ბუგიანიშვილმა მიიღო. ამით მან პროკურატურის შუამდგომლობა გაიზიარა.

მას შემდეგ, რაც წინასასამართლო სხდომის მსგავსად, პროკურატურამ საქმის არსებითი განხილვის დახურვაც მოითხოვა მოსამართლემ ბრალდების მხარეს საქმეში ნახსენები პირების არდასახელება შესთავაზა. თუმცა, პროკურატურის წარმომადგენლებს მიაჩნდათ, რომ შეუძლებელი იქნებოდა.

მოსამართლემ სხდომის დახურვის შესახებ პროკურატურის შუამდგომლობები ღია სხდომაზე განიხილა. სხდომაზე პროკურორმა, ჯარჯი წიკლაურმა განაცხადა, რომ საქმე ბრალდებულის, დეკანოზ გიორგი მამალაძის პირადი ცხოვრების დეტალებს შეიცავს.

მოსამართლემ სხდომის დახურვის მოტივი ასე განმარტა:

"საქმეში არსებულ მასალები ეხება პიროვნებებს, მათი პირადი ცხოვრების დეტალებს, რომლის საჯარო განხილვა შელახავს როგორც ბრალდებულის, ასევე, ამ პიროვნებების ინტერესებს. საქმეში არსებული სხვა დოკუმენტები შეიცავენ კონკრეტული პირების პერსონალურ მონაცემებს და ამ შემთხვევაში, ინტიმურ მონაცემებს. სასამართლოს მიაჩნია, რომ.მისი საჯაროდ განხილვა მკვეთრად ეწინააღმდეგება სასულიერო პირთა მორალურ პრინციპებს."

საქართველოს მთავარმა პროკურატურამ 27 აპრილს განცხადება გაავრცელა, რომ ე.წ. ციანიდის საქმეზე გამოძიება დაასრულა.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.