თბილისის საქალაქო სასამართლოს ცნობით, ავტომანქანის ხელოსნის მკვლელობისათვის ბრალდებული 18 წლიან სასჯელს ხონი-ქუტირის ფსიქიკური ჯანმრთელობის ეროვნულ ცენტრში გამოჯანმრთელებამდე მოიხდის.

ამავე საქმეზე, დანაშაულის შეუტყობინებლობისთვის ბრალდებულს კი თბილისის საქალაქო სასამართლოს სისხლის სამართლის კოლეგიამ სამი წლით თავისუფლების აღკვეთა განუსაზღვრა.

საქმე ეხება, თბილისში, ვაკეში, 2016 წლის სექტემბერში, ავტოფარეხში განთავსებულ სახელოსნოსთან მომხდარ შემთხვევას, რა დროსაც ბრალდებულმა შურისძიების მოტივით, ავტომატური ცეცხლსასროლი იარაღიდან გასროლით რამაზ მჭედლიშვილს გულმკერდის არეში მიაყენა ცეცხნასროლი გამჭოლი ჭრილობა და მიუხედავად გაწეული სამედიცინო დახმარებისა, იგი გარდაიცვალა.

წარდგენილი ბრალის თანახმად, მას ბრალად ედებოდა განზრახ მკვლელობა, ასევე ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარება. მასვე, ბრალად ედებოდა ცივი იარაღის ტარება.

შემთხვევის ადგილზე ბრალდებულს თან ახლდა სხვა პირიც, რომელმაც განსაკუთრებით მძიმე დანაშაულის ჩადენის თაობაზე არ აცნობა სამართალდამცავ ორგანოებს.

სასამართლოს განცხადებით, საქმის მასალების გამოკვლევისას, დადგინდა, რომ ბრალდებულს აქვს ფსიქიკური პრობლემები, თუმცა ექსპერტიზის შეფასებით, დანაშაულის ჩადენისას იგი შერაცხადი იყო:

"ბრალდებულს სასამართლომ მკვლელობისათვის წარდგენილ ბრალდებაში 12 წლით, ცეცხლსასროლი იარაღის მართლსაწინააღმდეგო შეძენა - შენახვისათვის 2 წლით, ხოლო ტარებისათვის 5 წლით თავისუფლების აღკვეთა განუსაზღვრა. მასვე, ცივი იარაღის ტარებისათვის 6 თვის ვადით თავისუფლების აღკვეთა მიესაჯა. ამ დანაშაულებისთვის დადგენილი სასჯელები შეიკრიბა ნაწილობრივ, ასევე სასჯელს დაემატა წინა განაჩენით მოუხდელი ნაწილი 3 წლით თავისუფლების აღკვეთა და საბოლოოდ, განაჩენთა ერთობლიობით, სასჯელის სახედ და ზომად 18 წლით თავისუფლების აღკვეთა განესაზღვრა".