საქართველოს ენერგეტიკის მინისტრი, კახა კალაძე გერმანელ ექსპერტებთან ერთად დუშეთის რაიონში, ხანდოს ხეობაში ჩავა და ელექტროგადამცემი ხაზების სამუშაოების პროცესს გაეცნობა. ამის შესახებ ხანდოს ხეობის რამდენიმე სოფლის მაცხოვრებლებთან ენერგეტიკის მინისტრის შეხვედრის შემდეგ სახელმწიფო ელექტროსისტემის მმართველთა საბჭოს თავმჯდომარემ, სულხან ზუმბურიძემ განაცხადა.

"ჩვენ შევთანხმდით, რომ ამ პროექტთან დაკავშირებით გავაგრძელებთ საუბარს. ჩვენი მხრიდან, კიდევ ერთხელ იქნა შეთავაზება, მინისტრის დავალებით, რომ ჩამოვალთ და ჩამოვიყვანთ გერმანელ ექსპერტებს და იქ ადგილზე, მოსახლეობასთან და სხვა დაინტერესებულ პირებთან ერთად შედგება დისკუსია, თუ რანაირად შეიძლება რომ ჩვენ ეს პროექტი განვახორციელოთ," - აღნიშნა ზუმბურიძემ.

ხანდოს ხეობის რამდენიმე სოფლის მოსახლეობა მათ საცხოვრებელ სახლებთან ელექტროგადამცემი ხაზების მშენებლობას რამდენიმე დღის განმავლობაში აპროტესტებდნენ. აქციის მონაწილეები ფიქრობდნენ, რომ სოფელში მაღალი ძაბვის გადამცემი ხაზის დამონტაჟება მათ ჯანმრთელობის პრობლემებს შეუქმნის.

გუშინ, 15 მაისს, ენერგეტიკის მინისტრმა, კახა კალაძემ ბრიფინგი გამართა, სადაც განაცხადა, რომ სოფელ ჭართალისა და მუგუდის მოსახლეობის პროტესტი, მაღალი ძაბვის გადამცემი ხაზების მონტაჟთან დაკავშირებით, დესტრუქციული ძალების მიერაა პროვოცირებული.