პარტია გირჩი აცხადებს, რომ ხელისუფლების სურვილი, შეზღუდოს ბიბლიური თავისუფლების საქმიანობა, ასევე მცდელობა, შეინარჩუნოს სავალდებულო საყარაულო სამსახური, არის არალეგიტიმური მიზანი.

გირჩს მიაჩნია, რომ მთავრობის კანონპროექტს შინაარსი არ გააჩნია:

"ჯარიდან თავის არიდება დღესაც დასჯადი ქმედებაა და მომავალშიც ასეთად დარჩება. ბიბლიური თავისუფლება დღესაც სახელმწიფოს მიერ აღიარებული ეკლესიაა და მომავალშიც ასეთად დარჩება, ისევე, როგორც დღესაც და მომავალშიც მღვდელთმსახურის სტატუსის მინიჭება იქნება ეკლესიის შიდა საქმე და ისევე, როგორც დღესაც და მომავალშიც მღვდელთმსახურები სავალდებულო საყარაულო სამსახურის გადავადების საფუძველი არის და იქნება.

ბიბლიური თავისუფლების მღვდელთმსახურად გახდომა განმარტოს, როგორც ჯარიდან თავის არიდების მიზნით "სხვაგვარ მოტყუებად" - ისეთივე აბსურდია, როგორც უნივერსიტეტში სწავლა განიმარტოს ჯარიდან თავის არიდების მიზნით "სხვაგვარ მოტყუებად".

კონსტიტუციით არ არის გარანტირებული საკუთარი შვილის "ჯარის მოხდის" გარეშე სუს-ის მაღალანაზღაურებად სამსახურში „დასაქმების უფლება“ - მითუმეტეს მაშინ, როდესაც სხვისი შვილების დასამონებლად მცდელობას არ აკლებ".

გირჩის განცხადებაში ასევე ნათქვამია, რომ თუ კანონმდებლობაში არ შეიცვლება რელიგიური ორგანიზაციების აღიარების შესახებ ჩანაწერი და ერთადერთ "სერიოზულობის ტესტად" დარჩება სახელმწიფო რეგისტრაცია - ბიბლიური თავისუფლება ამ ტესტს უპრობლემოდ გაივლის/უკვე გაიარა.

საქართველოს პარლამენტში წარდგენილია კანონპროექტი, რომლის მიხედვით წვევამდელის მიერ სამხედრო სამსახურისთვის თავის არიდება, მათ შორის, ავადმყოფობის სიმულაციით, სხეულის თვითდაზიანებით, ყალბი დოკუმენტის გამოყენებით ან სხვაგვარად მოტყუებით - ისჯება ჯარიმით ან თავისუფლების აღკვეთით ვადით სამ წლამდე.