NDI-ს კვლევის მიხედვით, სოფელში მცხოვრებთა 43 პროცენტს ინტერნეტი არასდროს გამოუყენებია. ეს წილობრივი მაჩვენებელი უსწრებს როგორც ეროვნულ დონეზე (32%), ისე უმცირესობათა დასახლების (35%), პატარა ქალაქებისა (28%) და დიდი ქალაქების (23%) მაჩვენებელს. გამოკითხვის მიხედვით, პროცენტულად ყველაზე ნაკლებია იმ მოქალაქეების წილი თბილისში, ვისაც არასდროს გამოუყენებია ინტერნეტი. თბილისში ყოველ მეხუთე ადამიანს (22%) ინტერნეტი არასდროს გამოუყენებია.

ინტერნეტის ყოველდღიურად გამოყენების ყველაზე დაბალი მაჩვენებელი (32%) სოფლებში დაფიქსირდა, შედარებით მაღალია ეს მაჩვენებელი უმცირესობათა დასახლებებში. ყოველი მეორე (50%) ადამიანი იყენებს ინტერნეტს ყოველდღიურად პატარა ქალაქებში, დიდ ქალაქებსა (64%) და თბილისში (64%) კი, თითქმის იდენტურია.

უმცირესობათა დასახლებაში გამოკითხულთა ოთხმა პროცენტმა არ იცის ინტერნეტი რა არის.

NDI-ის მიერ დღეს გამოქვეყნებული კვლევის მიხედვით, მოსახლეობის 16 პროცენტისთვის პოლიტიკისა და მიმდინარე მოვლენების შესახებ ინფორმაციის მიღების მთავარი წყარო ინტერნეტია. ინტერნეტი მეორე არჩევნად დაასახელა 25-მა პროცენტმა.

კვლევის საველე სამუშაოები NDI-ის დაკვეთით, CRRC-იმ 2017 წლის 7-28 აპრილის პერიოდში ჩაატარა. გამოკითხული 2 493 მოქალაქე წარმომადგენლობითი შერჩევის წესით, მთელი ქვეყნის მასშტაბით (ოკუპირებული ტერიტორიების გარდა) შეირჩნენ და პირისპირ ინტერვიუს სახით გამოკითხეს. კვლევის ცდომილების ზღვარია 2,7 პროცენტი. კვლევა დიდი ბრიტანეთის მთავრობის UK aid-ის ფინანსური მხარდაჭერით ჩატარდა.