საქართველოს მართმადიდებელი ეკლესიის საპატრიარქოს იურისტის განცხადებით, მისთვის მიუღებელია ციანიდის საქმის წინასაპროცესო სხდომის დახურვა. მისი თქმით, ეკლესიას დასამალი არაფერი აქვს და ბრალდების მხარის მიერ საპატრიარქოს იმიჯზე ზრუნვა კატეგორიულად მიუღებელია:

"ჩემი აზრია, რომ სხდომა უნდა იყოს საჯარო და შუამდგომლობაში იმ არგუმენტების მოშველიება, რომ კონსტიტუციური შეთანხმებიდან გამომდინარე, ეკლესიის განსაკუთრებული როლიდან გამომდინარე არ შეილახოს საქართველოს საპატრიარქოს იმიჯი, ეს არის ჩვენთვის კატეგორიულად მიუღებელი. საპატრიარქო და საქართველოს მართმადიდებელი ეკლესია განსაცდელის ჟამს უფრო ძლიერდება ვიდრე სუსტდება, ამიტომ ჩვენ დასამალი არაფერი გვაქვს."

იურისტის განცხადებით, საპატრიარქოდან არ ყოფილა არანაირი თხოვნა ან/და მითითება, რომ სხდომა დახურულიყო. ის ხაზს უსვამს, რომ კატეგორიულად მიუღებელია, თითქოს ეკლესიის ინტერესებში შედის სხდომის დახურვა.

მოსამართლის გადაწყვეტილებით, ციანიდის საქმის წინასასამართლო სხდომა სრულად დაიხურა.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.