საქართველოს სახალხო დამცველი, უჩა ნანუაშილი შეშფოთებას გამოთქვამს მარნეულში ცოლად მოყვანის მიზნით სკოლის მოსწავლის "მოტაცების" შესახებ. ამის შესახებ განცხადება სახალხო დამცველმა დღეს, პირველ მაისს გაავრცელა.

მას მიაჩნია, რომ არასრულწლოვანთა ქორწინებას, განსაკუთრებით „მოტაცების“ კონტექსტის გათვალისწინებით, შესაძლოა, პოტენციური გავლენა ჰქონდეს ბავშვის ჯანმრთელი განვითარების, ძალადობისგან თავისუფალ გარემოში ცხოვრებისა და განათლების მიღების უფლებაზე.

"აღსანიშნავია, რომ პოლიციას დღე-ნახევარი დასჭირდა გოგოს ადგილსამყოფელის დასადგენად. სახალხო დამცველმა გამოითხოვა ინფორმაცია პოლიციის მიერ გატარებულ ღონისძიებებსა და ქმედებებთან დაკავშირებით და დეტალურად შეისწავლის რამდენად ეფექტურად მოქმედებდა სამართალდამცავი უწყება აღნიშნული ფაქტის შეტყობინების მომენტიდან გოგოს ადგილსამყოფელის დასადგენად," - აღნიშნავს სახალხო დამცველი.

როგორც განცხადებაში წერია, სახალხო დამცველი მარნეულის მუნიციპალიტეტის სოფელ თაქალოში სიტუაციის მონიტორინგს აგრძელებს და ადრეული ქორწინების ამ კონკრეტულ შემთხვევაზე სამართალდამცავი უწყებებისა და სოციალური სააგენტოს მუშაობის ეფექტიანობას შეისწავლის.

სკოლაში მიმავალი არასრულწლოვანი გოგო 28 აპრილს ქვემო ქართლში, ცოლად მოყვანის მიზნით, გაიტაცეს. საქმეზე გამოძიება სისხლის სამართლის კოდექსის 143-ე მუხლით მიმდინარეობს, რაც თავისუფლების უკანონო აღკვეთას გულისხმობს და ისჯება პატიმრობით ორიდან ოთხ წლამდე.

საქართველოს შინაგან საქმეთა სამინისტროს ინფორმაციით, 28 აპრილს არასრულწლოვანი გოგოს გატაცებაში ბრალდებული თავისუფალია. უწყების პრესსამსახურმა On.ge-ს განუცხადა, რომ პირი გატაცებულის [გოგოს] ჩვენების საფუძველზე გაათავისუფლეს, გამოძიება კი გრძელდება.