ეროვნულ-დემოკრატიული ინსტიტუტის (NDI) კვლევის მიხედვით, კითხვაზე, როგორ შეაფასებდით უკრაინაში რუსეთის შეჭრაზე ლიდერების საპასუხო ქმედებებს, გამოკითხულთა 46% პრემიერმინისტრის, ირაკლი ღარიბაშვილის განცხადებებს დადებითად აფასებს, პრეზიდენტ სალომე ზურაბიშვილისას კი 63%.

ღარიბაშვილის განცხადებას უარყოფითად გამოკითხულთა 37% აფასებს, ხოლო ზურაბიშვილისას 18%.

კვლევაში, ასევე, აღნიშნულია, რომ პრეზიდენტს ოდნავ მაღალი მხარდაჭერა ქალებში აქვს, ხოლო პრემიერმინისტრს დაბალი შეფასება აქვს ახალგაზრდებსა და თბილისის მაცხოვრებლებს შორის.

ფოტო: NDI

NDI-ის კვლევა დიდი ბრიტანეთის მთავრობის UK aid ფინანსური ხელშეწყობით ხორციელდება. კვლევა ჩატარებულია CRRC საქართველოს მიერ. ორგანიზაციის განცხადებით, ანგარიში რუსეთის მიერ უკრაინაში შეჭრამდე დაახლოებით ორი კვირით ადრე (3-15 თებერვალს) და ორი კვირის შემდეგ (9-20 მარტს) ჩატარდა და ქვეყნის წარმომადგენლობით (ოკუპირებილი ტერიტორიების გამოკლებით) ორი სატალეფონო გამოკითხვის შედეგებს ემყარება. რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით აარჩიეს. ინტერვიუები ჩატარდა: ქართულ, აზერბაიჯანულ, სომხურ და რუსულ ენებზე.

თებერვლის კვლევაში ჩატარდა 2 036 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი - +/- 1.8 პროცენტი. მარტის კვლევაში 2 204 დასრულებული ინტერვიუ (18% გამოპასუხება AAPOR სტანდარტების მიხედვით). საშუალო ცდომილების ზღვარი +/- 1.6 პროცენტია. ცდომილების ზღვარი იცვლება სხვადასხვა კითხვის მიხედვით.