საქართველოს შინაგან საქმეთა სამინისტროს თანამშრომლებმა საგარეჯოში დაკარგული 15 წლის ბიჭი ცხენების მოპარვის ბრალდებით დააკავეს. უწყებაში ამბობენ, რომ პირი სამართალდამცავებმა გუშინ, 29 აპრილს იპოვეს.

"დაკარგული ორი ცხენი ამოღებულია ნივთმტკიცებად,"- აცხადებენ შსს-ში.

უწყება საქმეს სისხლის სამართლის კოდექსის 177-ე მუხლით იძიებს. ამ მუხლით გათვალისწინებულია:

  • სხვისი მოძრავი ნივთის ფარული დაუფლება მართლსაწინააღმდეგო მისაკუთრების მიზნით ისჯება ჯარიმით ან თავისუფლების შეზღუდვით ვადით ერთიდან სამ წლამდე ანდა თავისუფლების აღკვეთით იმავე ვადით;
  • იმავე ქმედებამ თუ მნიშვნელოვანი ზიანი გამოიწვია, ან ჩადენილი სადგომში ან სხვა საცავში უკანონო შეღწევით მოხდა ისჯება თავისუფლების აღკვეთით ვადით სამიდან ხუთ წლამდე;
  • ქურდობა წინასწარი შეთანხმებით ჯგუფის მიერ, არაერთგზის, ბინაში უკანონო შეღწევით ან სატრანსპორტო საშუალების წინააღმდეგ ისჯება თავისუფლების აღკვეთით ვადით ოთხიდან შვიდ წლამდე;
  • ქურდობა ორგანიზებული ჯგუფის მიერ, დიდი ოდენობით, იმის მიერ, ვინც ორჯერ ან მეტჯერ იყო ნასამართლევი სხვისი ნივთის მართლსაწინააღმდეგო მისაკუთრებისთვის ან გამოძალვისათვის ისჯება თავისუფლების აღკვეთით ვადით ექვსიდან ათ წლამდე.

პირის დაკარგვის შეტყობინება 112-ში 28 აპრილს შევიდა. მოზარდის დაკარგვის შესახებ ინფორმაცია თავდაპირველად რუსთავი 2-მა გაავრცელა. არხი, დაკარგულის ოჯახის წევრებზე დაყრდნობით, იუწყებოდა, რომ მოზარდი, მშობლების ნებართვის გარეშე, მეზობელ სოფელში მწყემსად მუშაობდა. ოჯახმა ტელეკომპანიას განუცხადა, რომ მოზარდის დაკარგვის შესახებ ფერმის წარმომადგენლებისგან შეიტყვეს.