ევროკომისიის პრეზიდენტი ურსულა ფონ დერ ლაიენის განცხადებით, ევროკავშირის წევრმა ქვეყნებმა, ვისაც შეუძლია, უკრაინას იარაღი უნდა მიაწოდონ. მისი თქმით, უკრაინაში ვიზიტმა კიდევ ერთხელ მისცა მოტივაცია, დაეხმაროს. ლაიენმა ასევე აღნიშნა, რომ უკრაინამ უნდა მიიღოს ყველაფერი, რაც მას სჭირდება თავის დასაცავად.

"ეს ყველა წევრ ქვეყანას ეხება, ვისაც შეუძლია, ძალიან სწრაფად უნდა მიაწოდოს იარაღი, რადგან მხოლოდ ამის შემდეგ შეძლებს უკრაინა გადარჩენას რუსეთის წინააღმდეგ ამ მტკივნეულ თავდაცვით ბრძოლაში“, — განაცხადა ფონ დერ ლაიენმა Bild-თან ინტერვიუში.

მან რუსეთის წინააღმდეგ სანქციათა მეექვსე პაკეტზეც ისაუბრა და თქვა, რომ ის შეიძლება, განსაკუთრებით მიმართული იყოს რუსეთის ბანკის, Sberbank-ის წინააღმდეგ და მოიცავდეს ემბარგოს რუსულ ნავთობზე.

გუშინ, 16 აპრილს უკრაინის პრეზიდენტმა ვლადიმერ ზელენსკიმ ვიდეომიმართვისას, თქვა, რომ უკრაინას დასავლეთის მეტი მატერიალური მხარდაჭერა სჭირდებოდა, რათა ალყაში მოქცეული ქალაქი მარიუპოლი გადაარჩინოს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში