უკრაინის პრეზიდენტმა, ვოლოდიმირ ზელენსკიმ ლიეტუვის პარლამენტში მიმართვისას განაცხადა, რომ გაუპატიურების ასეულობით შემთხვევა აღირიცხა, მათ შორის არასრულწლოვანი გოგოების და ჩვილი ბავშვის.

"არის სოფლები, საკმაოდ დიდი სოფლები, რომლებიც თითქმის მოსახლეობის გარეშე დარჩა. ასეულობით ბავშვი დაობლდა. ასეა, ასეულობით ბავშვი, რადგან ჯერ არ ვიცით მსხვერპლების ზუსტი რაოდენობა. გაუპატიურების ასეულობით შემთხვევა აღირიცხა, არასრულწლოვანი გოგოების, ძალიან პატარა ბავშვების... ჩვილი ბავშვისაც კი! ამაზე საუბარი, უბრალოდ, საშინელებაა ახლა, თუმცა ეს სიმართლეა. ეს მოხდა", — განაცხადა ზელენსკიმ.

უკრაინის პრეზიდენტის განცხადებით, იდენტიფიცირებულია ის პიროვნება, ვინც ჩვილის გაუპატიურებაშია ბრალდებული — ეს რუსი ჯარისკაცია პსკოვიდან, გვარად ბიჩკოვი. ზელენსკის თქმით, მან თანამებრძოლებს ვიდეოც კი გაუგზავნა, სადაც ასახული იყო როგორ ტანჯავდა ბავშვს.