მინესოტელმა მეხანძრეებმა გადაწყვიტეს, რომ თანამშრომლისთვის, რომელსაც კიბოს დიაგნოზი დაუსვეს, მხარდაჭერა თავების გადაპარსვით გამოეხატათ. კრისტიან უორბის გასული წლის ოქტომბერში მიელომა დაუდგინდა, რაც სისხლის კიბოს ერთ-ერთი ყველაზე იშვიათი ფორმაა.

"მინდოდა, რომ კლინიკაში ხანგრძლივ პროცედურებზე წასვლამდე თავი გადამეპარსა, რათა ჩემი შვილები ახალ რეალობას რამდენიმე დღით ადრე შეეგუებოდნენ", — ამბობს მეხანძრე. თუმცა უორბი გაოცებული დარჩა, როცა დაინახა, რომ თანამშრომლებმაც გადაიპარსეს თავები და მისი გაცილება ასე გადაწყვიტეს.

"ძალიან მოულოდნელი იყო. ეს ძალიან ბევრს ნიშნავს ჩემთვის. დიახ, ეს ბიჭები აშკარად ზრუნავენ ჩემზე", — თქვა უორბიმ. ვიდეო კი, რომელშიც თავგადაპარსული მეხანძრეები უორბის ეგებებიან, სახანძროს ოფიციალურ ფეისბუქის გვერდზე გამოქვეყნდა.

"მას ყოველთვის შეუძლია ადამიანები კარგ განწყობაზე დააყენოს და გასაჭირიდან ყურადღება სხვა რამეზე გადაატანინოს. ის ყოველთვის გვაცინებს და მოუთმენლად ველით მასთან ერთად მუშაობას", — ამბობს უორბის ერთ-ერთი თანამშრომელი მეხანძრე.

კრისტიანი 6 კვირით ქალაქ როჩესტერის კლინიკაში გაემგზავრა, ხოლო მის თანაგუნდელ მეხანძრეებს იმედი აქვთ, რომ სახლში დაბრუნების შემდეგ ის სამუშაოს გაგრძელებას მალევე შეძლებს.