საფრანგეთი უკრაინას რუსეთის მიერ ჩადენილი ომის დანაშაულების გამოძიებაში დაეხმარება. უკრაინაში საფრანგეთის ელჩის, ეტიენ დე პონსინის განცხადებით, ლვოვში ჩავიდა ტექნიკური და სამეცნიერო დანაყოფის ფრანგი ჟანდარმები.

"სიამაყით მივესალმებით ლვოვში ტექნიკურ და სამეცნიერო ჟანდარმთა რაზმს, რომლებიც ჩამოვიდნენ დასახმარებლად კიევის ირგვლივ ჩადენილი ომის დანაშაულების გამოძიებაში. საფრანგეთი პირველი ქვეყანაა, რომელიც უკრაინას ამ ტიპის დახმარებას გაუწევს", — წერს ის.

მას შემდეგ, რაც ქალაქებისა და დასახლებების ნაწილზე უკრაინულმა ჯარებმა კონტროლი დაიბრუნეს, ვრცელდება, როგორც ადგილობრივი, ასევე, საერთაშორისო მედიების გადაღებული ფოტო-ვიდეო მასალა, სადაც ჩანს, რომ ქუჩებში ადამიანების ცხედრებია, მათ ნაწილს ხელებიც კი აქვს შეკრული.