საქართველოს პარლამენტის წევრი, ირაკლი სესიაშვილი ამბობს, რომ მისი შვილის, დავით სესიაშვილის ანაბეჭდები მისი მეგობრის გაძარცვულ მანქანაშია აღმოჩენილი. ეს განცხადება ირაკლი სესიაშვილმა რამდენიმე წუთის წინ ნაციონალური მოძრაობის მიერ მისი შვილის შესაძლო დანაშაულის ჩადენის შესახებ ინფორმაციაზე.

"ყოველდღიურ რეჟიმში ჰქონდათ ურთიერთობა და ამ მანქანაზე აღმოჩენილია რამდენიმე პირის თითის ანაბეჭდი, მათ შორის ჩემი შვილის და თავისთავად ცხადია და ეჭვი არ შეეპარება ცხადად მოაზროვნე საზოგადოებას, რომ ეს ბუნებრივი რამ არის, რომ ავტომობილზე რამდენიმე ადამიანის ანაბეჭდია და მით უფრო იმის, ვინც ბავშვობის მეგობარია," - აღნიშნა სესიაშვილმა საქართველოს პროკურატურასთან.

ერთიანი ნაციონალური მოძრაობის წევრმა, გუშინ პრესკონფერენცია გამართა, სადაც აღნიშნა, რომ მთავარი პროკურორის ჩარევით საქართველოს პარლამენტის დეპუტატის, ირაკლი სესიაშვილის შვილის, დავით სესიაშვილის დანაშაულებრივი საქმე მიიჩქმალა.

გუშინ ირაკლი სესიაშვილმა ნაციონალური მოძრაობის მიერ მისი შვილის მიმართ გამოთქმული ბრალდებები თავის საქმიანობას დაუკავშირა. სახელმწიფო უსაფრთხოების სამსახურში კი ამბობენ, რომ ირაკლი სესიაშვილის შვილს, დავით სესიაშვილს დანაშაული არ ჩაუდენია და ის კანონის დაცვით დასაქმდა უწყებაში.

შესწორება: მასალის თავდაპირველ ვერსიაში აღნიშნული იყო, რომ სესიაშვილი შვილის ანაბეჭდების მოპარულ ავტომობილში აღმოჩენაზე საუბრობდა. სესიაშვილი კი, გაძარცვულ მანქანაზე საუბრობდა.