პოლონეთის მმართველი პარტიის ლიდერის, იაროსლავ კაჩინსკის განცხადებით, პოლონეთი ღიაა იმისთვის, რომ საკუთარ ტერიტორიაზე ამერიკის შეერთებული შტატების ბირთვული იარაღი განათავსოს, თუმცა დასძენს, რომ ამაზე საუბარი არ ყოფილა.

გერმანულ გაზეთ Welt am Sonntag-თან საუბარში მან აღნიშნა, რომ პოლონეთი ევროპაში აშშ-ის ჯარების გაზრდას მიესალმება.

"პოლონეთი კმაყოფილი იქნება, თუ აშშ რუსეთის მზარდი აგრესიის გამო, ევროპაში ჯარისკაცების რაოდენობას 100 000-დან 150 000-მდე გაზრდის. აქედან 75 000 ჯარისკაცი უნდა განლაგდეს აღმოსავლეთის ფლანგზე, ანუ, რუსეთთან საზღვარზე, 50 000 ჯარისკაცი ბალტიისპირეთის ქვეყნებსა და პოლონეთში", — განაცხადა მან.