რუსეთის თავდაცვის სამინისტროს ცნობით, აზერბაიჯანის შეიარაღებულმა ძალებმა მთიან ყარაბაღში რუსი "სამშვიდობოების" მიერ კონტროლირებული ტერიტორია გადაკვეთეს და Bayraktar TB2-ის უპილოტო საფრენი აპარატით რამდენიმე თავდასხმა განახორციელეს. ამის შესახებ რუსული სახელმწიფო მედია ავრცელებს ინფორმაციას.

"24-დან 25 მარტის პერიოდში, აზერბაიჯანის რესპუბლიკის შეიარაღებული ძალები, 2020 წლის 9 ნოემბერს აზერბაიჯანს, სომხეთსა და რუსეთს შორის დადებული სამმხრივი შეთანხმების დარღვევით შევიდნენ მთიან ყარაბაღში, რუსი სამშვიდობო კონტიგენტების პასუხისმგებლობაში მყოფ ზონაში და სათვალთვალო პოსტი მოაწყვეს. მთიანი ყარაბაღის შეიარაღებულ ფორმირებაზე, ფურუხთან ახლოს განხორციელდა 4 თავდასხმა Bayraktar TB2-ის უპილოტო საფრენი აპარატით", — ნათქვამია განცხადებაში.

მედიის ცნობით, ამ ეტაპზე რუსი "სამშვიდობოები" სიტუაციის მოსაგვარებლად და სამხედროების თავდაპირველ პოზიციებზე დასაბრუნებლად შესაბამის ზომებს იღებენ.

მანამდე ეს ინფორმაცია სომხურმა მხარემ გაავრცელა და თქვა, რომ აზერბაიჯანელმა სამხედროებმა მთიან ყარაბაღში სომხებით დასახლებული სოფელი დაიკავეს. სტეფანაკერტის (ხანქენდი) ხელისუფლების ცნობით, დაიღუპა 2 სომეხი სამხედრო და შეტაკებების მიმდებარედ აზერბაიჯანული დრონები გაუშვეს.