საქართველოს პრეზიდენტს, სალომე ზურაბიშვილსა და საგარეო საქმეთა და უსაფრთხოების პოლიტიკის საკითხებში ევროკავშირის უმაღლეს წარმომადგენელს, ჯოზეფ ბორელს შორის სატელეფონო საუბარი გაიმართა. ზურაბიშვილის განცხადებით, მათ საქართველოს ევროინტეგრაციის გზა და უსაფრთხოება განიხილეს.

"საქართველოს დაჩქარებული წესით ევროინტეგრაციის გზასა და უსაფრთხოებაზე, მათ შორის, შავის ზღვის უსაფრთხოებაზე ჯოზებ ბორელს ვესაუბრე. მადლობა მას საქართველოს სუვერენიტეტისა და ტერიტორიული მთლიანობისადმი მხარდაჭერისთვის", — წერს ზურაბიშვილი Twitter-ზე.

უკრაინის პრეზიდენტმა, ვოლოდიმირ ზელენსკიმ ქვეყნის ევროკავშირში გაწევრიანების მოთხოვნას ხელი 28 თებერვალს მოაწერა. პირველ მარტს კი ევროპარლამენტმა მიიღო რეზოლუცია, რომელიც უმკაცრესად გმობს რუსეთის უკანონო შეჭრას უკრაინაში და მხარს უჭერს უკრაინისთვის ევროკავშირის კანდიდატის სტატუსის მინიჭებას.

ამის შემდეგ, 2 მარტს ქართული ოცნების თავმჯდომარემ, ირაკლი კობახიძემ განაცხადა, რომ საქართველო ევროკავშირის წევრობის კანდიდატის სტატუსის მისაღებად განაცხადს ხელს მოაწერდა, რაც 3 მარტს პრემიერმინისტრმა გააკეთა.