Netflix-ის განცხადებით, პლატფორმა ახალ გზებზე მუშაობს, რათა ოჯახის გარეთ ერთი ანგარიშის გაზიარება უფასოდ აღარ იყოს შესაძლებელი. თუ მომხმარებელს სურს, რომ თავისი ანგარიში ოჯახის გარეთ მყოფ ადამიანს გაუზიაროს, მაშინ დამატებითი თანხის გადახდა მოუწევს.

Netflix ამ ეტაპზე მხოლოდ ჩილეში, კოსტა-რიკასა და პერუში გეგმავს ახალი წესის ამუშავებას და ადგილობრივი მომხმარებლები დამატებითი გადასახადის შესახებ შეტყობინებას მალე მიიღებენ. "სანამ ცვლილებებს მთელ მსოფლიოში განვახორციელებთ, ჯერ ამ სამ ქვეყანას დავაკვირდებით და გავიგებთ, თუ როგორ იმუშავებს პლატფორმა", — ამბობს Netflix-ის წარმომადგენელი.

ახალი წესის მიხედვით, Netflix-ის ანგარიშის გაზიარებისას ყველა წევრს საკუთარი პროფილი და პაროლი ექნება, რაც კომპანიის თქმით, გაცილებით "უსაფრთხო და მარტივია". ამ ეტაპზე Netflix-ის ანგარიშის გაზიარება პერუში 2,1 დოლარი ეღირება, კოსტა-რიკაში 2,99 დოლარი, ხოლო ჩილეში 2,98 დოლარი.

Netflix ძალიან დიდი ხნის განმავლობაში თვალს ხუჭავდა პაროლის გაზიარების ფაქტებზე. თუმცა ამ ეტაპზე Netflix-ს 222 მილიონ მომხმარებელი ჰყავს და ისეთ კომპანიებს უწევს კონკურენციას, როგორიც Disney+-ია. აქვე უნდა აღინიშნოს, რომ Netflix-ის აქციების ფასი გასულ წელთან შედარებით 41%-ით დაეცა.