რუსეთმა უკრაინის წინააღმდეგ სრულმასშტაბიანი ომი დაიწყო. ომთან დაკავშირებული სახიფათო გარემო განსაკუთრებით მძიმე ორსული ვიქტორიასთვის აღმოჩნდა, რომელიც ომის დროს კიევში იმყოფებოდა.

უკრაინის ომის მეორე დღე ვიქტორიასთვის რთული იყო, რადგან იცოდა, რომ მალე იმშობიარებდა. დაბომბვის გამო ქალაქ კიევში მოძრაობა საშიში იყო, თუმცა ქმართან ერთად ვიქტორია ყველაზე ახლომდებარე საავადმყოფოში წავიდა.

ფოტო: Reuters

ვიქტორიას თქმით, როცა საავადმყოფოში მივიდნენ, მთლიანად ჩაბნელებული დახვდათ, რადგან თანამშრომლებს დაბომბვის ეშინოდათ. მოგვიანებით კი ექიმმა ვიქტორია კომფორტულ პალატაში მოათავსა.

საავადმყოფოში მისვლიდან ორი საათის შემდეგ სირენების ხმა გაისმა და ყველას მიწისქვეშა თავშესაფარში მოუწია გადასვლა. "თავშესაფარში ჩემთვის ერთი პატარა ოთახი იყო გამოყოფილი, რომელსაც კარი არ ჰქონდა და მხოლოდ ფარდა აშორებდა მთავარი ოთახიდან, რომელშიც 50 ადამიანი იმყოფებოდა. იმედი მქონდა, რომ პალატაში დავბრუნდებოდი, მაგრამ მშობიარობა მალევე დამეწყო", — ამბობს ვიქტორია.

ფოტო: Reuter

რთული პირობების მიუხედავად, მშობიარობამ წარმატებით ჩაიარა და კიევის ბუნკერში ახალშობილი დაიბადა."შენ გაგიმართლა, განსაკუთრებული ხარ! შენ უკრაინაში დაიბადე და ახალი უკრაინელი ხარ", — ასე მიმართა ვიქტორიამ თავის პატარას, როცა პირველად დაიჭირა ხელში.