NATO-ს გენერალური მდივანი, იენს სტოლტენბერგი აცხადებს, რუსეთი უკრაინაში დესტაბილიზაციის ფარული მცდელობებიდან ღია სამხედრო მოქმედებაზე გადავიდა.

"ვგმობთ მოსკოვის გადაწყვეტილებას დონეცკისა და ლუგანსკის სახალხო რესპუბლიკების აღიარების შესახებ. ასევე, ვგმობთ რუსეთის შემდგომ შეჭრას უკრაინაში. მოსკოვი უკრაინის დესტაბილიზაციის ფარული მცდელობიდან, ღია სამხედრო მოქმედებაზე გადავიდა. ეს სერიოზული ესკალაციაა რუსეთის მხრიდან და საერთაშორისო სამართლის უხეში დარღვევა.

ეს კრიზისი მხოლოდ რუსეთის შექმნილია. მივესალმებით უკრაინის თავშეკავებას, რომ არ უპასუხოს რუსეთის განმეორებით პროვოკაციებს. ჩვენ სოლიდარობას ვუცხადებთ უკრაინელ ხალხსა და მთავრობას", — აცხადებს გენერალური მდივანი.

სტოლტენბერგის თქმით, ყველაფერს გააკეთებენ ალიანსის აგრესიისგან დასაცავად.

"გავაკეთებთ ყველაფერს, რაც საჭირო იქნება იმისათვის, რომ დავიცვათ ალიანსი აგრესიისგან. NATO მოკავშირეებმა და დანარჩენმა საზოგადოებამ გააფრთხილა, რომ თუ რუსეთი გააგრძელებს აგრესიულ ქმედებებს უკრაინის წინააღმდეგ, ეს ძვირად დაუჯდებათ", — თქვა მან.

რუსეთის პრეზიდენტმა, ვლადიმერ პუტინმა უკრაინის ოკუპირებული ტერიტორიები თვითგამოცხადებული ლუგანსკი და დონეცკი "დამოუკიდებელ რესპუბლიკებად" აღიარა. პუტინმა ეს გადწყვეტილება უკრაინის "აგრესიით" ახსნა და გასამართლებლად არაერთი პროპაგანდისტული მესიჯი გააჟღერა. მან უკრაინის ხელისუფლებას მოუწოდა, "დროულად შეწყვიტონ სამხედრო ქმედებები", წინააღმდეგ შემთხვევაში კი "ნებისმიერ სისხლისღვრაზე" პასუხისმგებლობა მათ დააკისრა.

პუტინის გადწყვეტილება მინსკის შეთანხმების უხეში დარღვევაა, რასაც უკვე გამოეხმაურნენ მსოფლიო ლიდერები. ეს ქმედება დაგმო საქართველომაც.

აღიარების შემდეგ პუტინმა უკრაინის ტერიტორიაზე ჯარები გაგზავნა, მოტივად კი ისევ "სამშვიდობო მისია" დაასახელა. პუტინი ბრძანებაში ამტკიცებს, თითქოს უკრაინის ორი რეგიონის "დამოუკიდებლობა" კონფლიქტის მშვიდობიანი რეგულირებისა და მინსკის შეთანხმების გათვალისწინებით აღიარა.

დოკუმენტში ასევე ვკითხულობთ, რომ რუსეთს საგარეო საქმეთა სამინისტროს დაევალა, დონეცკისა და ლუგანსკის "მთავრობებთან" მოამზადოს მეგობრობის და ორმხრივი ურთიერთობების შეთანხმება. პუტინის ბრძანების მიხედვით, დონეცკისა და ლუგანსკის "მმართველების" მიმართვის საფუძველზე, შეთანხმების დადებამდე "სამშვიდობო მისიით" გააგზავნიან ჯარებს.