საქართველოს შრომის, ჯანმრთელობისა და სოციალური დაცვის სამინისტრო 10 რეანიმობილს ყიდულობს. შესყიდვის სავარაუდო ღირებულება 1 723 170 ლარია, რაც იმას ნიშნავს, რომ თითოეულ ავტომობილზე საშუალოდ 172 317 ლარის გადახდაა დაგეგმილი. შესაბამისი ტენდერი 7 აპრილს გამოცხადდა, წინადადებების მიღება კი 23 აპრილს იწყება.

სატენდერო მოთხოვნების მიხედვით, სასწრაფო სამედიცინო დახმარების ავტომობილზე სამი წლის ვადით, ან 200 ათასი კილომეტრის გარბენზე უნდა გავრცელდეს ქარხნული გარანტია ავტომობილის ძარაზე, ძრავაზე, გადაცემათა კოლოფზე, სავალ ნაწილზე, ელექტროობაზე და სხვა ძირითად აგრეგატებზე. ამავე დოკუმენტით მოთხოვნილია, რომ ავტომობილის შიდა აღჭურვილობაზე, სამედიცინო დანიშნულების საგნებზე, სამედიცინო აპარატურაზე, სასიგნალო ციმციმაზე და ხმოვან გამაძლიერებელზე გავრცელდეს არანაკლებ ორწლიანი საგარანტიო ვადა.

"ავტოსატრანსპორტო საშუალებების გეგმიური მომსახურეობის, თუ გაუთვალისწინებელი სერვისების ჩატარების აუცილებლობის შემთხვევაში ავტოსატრანსპორტო საშუალება, შემსყიდველის ხარჯებით გადაყვანილი იქნება მიმწოდებლის უახლოეს სერვისცენტრში, ხოლო რაც შეეხება სერვისს, მიმწოდებელი თუ ვერ უზრუნველყოფს ხელშეკრულებით შეთანხმებულ სერვისცენტრში ავტომობილის დაზიანების აღმოფხვრას და საჭირო გახდება მისი სხვა სერვისცენტრში გადაყვანა, სხვა სერვისცენტრში ავტომობილის გადაყვანას საკუთარი ხარჯებით უზრუნველყოფს მიმწოდებელი," - ვკითხულობთ დოკუმენტში.

ტენდერში განაცხადების მიღება 28 აპრილს დასრულდება.