ქართული ოცნების თავჯდომარემ, ირაკლი კობახიძემ შუალედურ არჩევნებში მაჟორიტარობის კანდიდატები დაასახელა. ამის შესახებ კობახიძემ პოლიტსაბჭოს შემდეგ გამართულ ბრიფინგზე განაცხადა.

რუსთავისა და გარდაბნის მუნიციპალიტეტის სოფლებში ქართული ოცნების კანდიდატი ირაკლი შატაკიშვილი, ხოლო ბათუმის საკრებულოს არჩევნებში რამაზ ჯინჭარაძე იქნება.

"ჩვენთვის პრინციპულად მნიშვნელოვანია ორივე არჩევნების მოგება. რუსთავი-გარდაბნის ოლქში არჩევნების მოგება მნიშვნელოვნად გააძლიერებს საპარლამენტო უმრავლესობის რიგებს. რაც შეეხება ბათუმის არჩევნებს, მასზე დამოკიდებულია ბათუმის საკრებულოში მყარი უმრავლესობის ჩამოყალიბება, რაც აუცილებელია ქალაქის შეუფერხებელი განვითარებისათვის", — განაცხადა კობახიძემ.

2 აპრილს საქართველოს პარლამენტისა და მუნიციპალიტეტის საკრებულოს შუალედური არჩევნები გაიმართება. ამომრჩევლები რუსთავში საქართველოს პარლამენტის, ხოლო ბათუმში საკრებულოს მაჟორიტარს აირჩევენ.