ნიუ-იორკში, კერძოდ როზამონდ გიფორდის ზოოპარკში, ერთი და იმავე სქესის პინგვინთა წყვილმა პირველ იანვარს ბარტყი გამოჩეკა. მშობლები მას საკვებითა და სითბოთი უზრუნველყოფენ.

ყველაფერი იმით დაიწყო, რომ ჰუმბოლდტის ჯიშის (Spheniscus humboldti) ორი მამრი პინგვინი, ელმერი და ლიმა, შეწყვილდა და გამრავლების სეზონისათვის ბუდე ააშენა. გასაგები მიზეზების გამო, მათ საკუთარი კვერცხი არ ჰქონდათ, თუმცა თავიანთ ტერიტორიას იცავდნენ და სხვა ნამდვილი მშობლებივით იქცეოდნენ. სწორედ ამიტომ, მომვლელებმა მათ ყალბი კვერცხი მიუტანეს იმის გასაგებად, თუ რამდენად სწორად მოუვლიდნენ მას.

"ზოგიერთი წყვილი ასეთ დროს ბუდეზე ჯდება, მაგრამ კვერცხს გვერდით ტოვებს და სწორად არ ჩეკს, ან პინგვინები ერთმანეთში ჩხუბობენ, თუ როდის რომელი უნდა დააჯდეს", — განაცხადა ტედ ფოქსმა, ზოოპარკის დირექტორმა — "სწორედ ასე ვაფასებთ, თუ ვინ გამოდგება მიმღებ მშობლად — ელმერი და ლიმა კვერცხის მოვლის ყოველ ასპექტში სამაგალითოები აღმოჩნდნენ".

გამოვლენილი წარმატების შედეგად ზოოპარკმა ყალბი კვერცხი ნამდვილით ჩაანაცვლა, ის კი ყოველგვარი გართულებების გარეშე გამოიჩეკა. უნდა აღინიშნოს, რომ მის ბიოლოგიურ მშობლებს ადრე სხვა კვერცხი გაუტყდათ და მიმღები მშობლების საჭიროებამაც სწორედ ამიტომ იჩინა თავი.

ამასთანავე, ზოოპარკებში მიმღებ მშობლებად ერთი და იმავე სქესის პინგვინთა წყვილი პირველად არ შეურჩევიათ — მსგავსი რამ ნიუ-იორკის ცენტრალურ პარკსა და ვალენსიის ოკეანოგრაფიულ აკვარიუმშიც მოხდა. ერთხელ ორმა აფრიკულმა პინგვინმა (Spheniscus demersusin) ნიდერლანდების ერთ-ერთ ზოოპარკში სხვა წყვილს კვერცხიც კი მოჰპარა გასაზრდელად.

აღსანიშნავია, რომ ერთი და იმავე სქესის პინგვინები ხშირად წყვილდებიან. ტაფტსის უნივერსიტეტის Museum Studies Blog-ზე დაყრდნობით, ბარტყის აღზრდისას მამრებსა და მდედრებს ერთი და იგივე მოვალეობები აკისრიათ, ამიტომაც ამასთან გამკლავება ერთი და იმავე სქესიანთა წყვილსაც თავისუფლად შეუძლია.

ფოქსის თქმით, ერთი და იმავე სქესის პინგვინთა წყვილები იმის მაგალითია, რომ "ოჯახის" იდეა მხოლოდ კონკრეტულ სახეობებს არ ეკუთვნის და პატარებს ხშირად არატრადიციული ოჯახებიც შესანიშნავად ზრდიან.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.