პარლამენტის საგარეო ურთიერთობათა კომიტეტის სხდომაზე, სადაც უკრაინის მხარდამჭერ რეზოლუციაზე მსჯელობდნენ, ხმაური იყო. ოპოზიციონერმა დეპუტატმა, სალომე სამადაშვილმა კომიტეტის თავმჯდომარეს მიმართა, რომ გადასულიყვნენ უშუალოდ განსახილველ საკითხზე, ამან კამათი გამოიწვია.

ნიკოლოზ სამხარაძემ რამდენჯერმე მიმართა სამადაშვილს, რომ "ნუ უზრდელობს, ნერვები დაემშვიდებინა". შემდეგ კი უთხრა, რომ მისი "საცირკო წარმოდგენა" დასრულდა და შესვენება გამოაცხადა.

"გადავიდეთ მსჯელობაზე, იმაზე რაც არის მნიშვნელოვანი რასაც ელოდება არა მხოლოდ მთელი ქვეყანა, არამედ საერთაშორისო პარტნიორებიც. კლოუნადის საყურებლად არ მოვსულვარ, აუხსენით საზოგადოებას თქვენი რეზოლუციის შინაარსი", — მიმართა სამადაშვილმა სამხარაძეს.

ამის საპასუხოდ, კი სამხარაძემ თქვა — "ნი მეჩრებით პირში, ძაან კარგად მიმყავს კომიტეტის სხდომა, დაწყნარდით და ნერვები დაიმშვიდეთ"

"მე გადავწყვეტ როდის გადავალთ საკითხის განხილვაზე. ვაიმე! ყოჩაღ, კიდევ ერთი საცირკო წარმოდგენა წარმატებით დაასრულეთ, ველოდებით, მომდევნო საცირკო წარმოდგენას მომდევნო კომიტეტზე", — უთხრა სამხარაძემ სამადაშვილს.

კამათი ამის შემდეგაც გაგრძელდა — "დამიწყნარდით, მე ვარ კომიტეტის თავმჯდომარე" — უთხრა სამხარაძემ სამადაშვილს, იქვე მოუწოდა წესრიგის დაცვისკენ და გააფრთხილა, რომ მანდატურებს მოუწევდათ გაეძევებინათ.

საბოლოოდ კომიტეტის თავმჯდომარემ ტექნიკური შესვენება გამოაცხადა და სხდომა რამდენიმე წუთში განახლდა.

ოპოზიცია რუსეთის ფედერაციის ჩაწერას ითხოვდა რეზოლუციაში, თუმცა კომიტეტზე მხარი პირველად ვერსიას დაუჭირეს.

უკრაინის მხარდამჭერი ქართული ოცნების რეზოლუციაში რუსეთი ნახსენები არ არის. ოპოზიცია კი ითხოვს, რუსეთი ჩაწერონ. კიდევ ერთი, რომელშიც მკაფიოდაა ხაზგასმული რომ რუსეთი აგრესორია როგორც უკრაინასთან, ისე საქართველოსთან მიმართებაში პარტია დროამ შეიმუშავა და სხვა ოპოზიციური პარტიები თანაავტორებად მიიწვია. რეზოლუციის ამ ვერსიას უკვე შეუერთდნენ ლელო, გირჩი — მეტი თავისუფლება, რესპუბლიკური პარტია და სტრატეგია აღმაშენებელი.

გაიგე მეტი: