გაფრთხილება: სტატია Sex and the City-ის ახალი სეზონის შესახებ სპოილერს შეიცავს.

ცოტა ხნის წინ Sex and the City-ის მსახიობი კრის ნოთი, რომელიც სერიალში მისტერ ბიგის როლს ასრულებს, ოთხმა ქალმა სექსუალურ ძალადობაში დაადანაშაულა. წაყენებული ბრალდებების გამო სერიალის ახალი სეზონის, And Just Like That-ის შემქმნელებმა სეზონის ფინალურ ეპიზოდში კრის ნოთის სცენის ამოჭრა გადაწყვიტეს.

აღსანიშნავია, რომ ნოთის პერსონაჟი ახალი სეზონის დასაწყისშივე გულის შეტევით გარდაიცვალა. ფინალურ ეპიზოდში, რომლის პრემიერაც 3 თებერვალსაა დაგეგმილი, მისტერ ბიგი პარიზში, კერისთან ერთად უნდა გამოჩენილიყო. სცენაში კერი მისტერ ბიგს ემშვიდობება.

კრის ნოთის წინააღმდეგ ბრალდებები დეკემბერში გავრცელდა. თავდაპირველად ორი ქალი ცალ-ცალკე დაუკავშირდა გამოცემა Hollywood Reporter-ს, როცა ახალი შოუს And Just Like That-ის კადრები იხილეს. მათ კრის ნოთი გაუპატიურებაში დაადანაშაულეს. მალე მსახიობს გაუპატიურებაში მესამე ქალმაც დასდო ბრალი, რის შემდეგაც მას სამსახიობო სააგენტო დაატოვებინეს. კრის ნოთი აღარც სერიალ The Equalizer-ში მიიღებს მონაწილეობას. სერიალის დატოვების შემდეგ კრის ნოთი სექსუალურ ძალადობაში მეოთხე ქალმაც დაადანაშაულა.

ბრალდებების შემდეგ სერიალის მთავარმა ტრიომ — სარა ჯესიკა პარკერმა (კერი), კრისტინ დეივისმა (შარლოტა) და სინტია ნიქსონმა (მირანდა) ტვიტერზე საერთო განცხადება გააკეთეს და ქალებს, რომლებიც კრის ნოთს ძალადობაში ადანაშაულებენ, მხარდაჭერა გამოუცხადეს:

"კრის ნოთის საწინააღმდეგო ბრალდებებმა ძალიან დაგვასევდიანა. ჩვენ მხარს ვუჭერთ ქალებს, რომლებმაც ხმა აიმაღლეს და საკუთარი მტკივნეული გამოცდილება გაგვიზიარეს. ვიცით, რომ ეს ძალიან რთულია და ამის გამო ჩვენ მათ პატივს ვცემთ", — ვკითხულობთ მსახიობების საერთო განცხადებაში.

კრის ნოთმა Hollywood Reporter-თან ინტერვიუში განაცხადა, რომ ეს ბრალდებები "კატეგორიულად მცდარია" და ქალებზე თავდასხმა უარყო. "არ აქვს მნიშვნელობა, ეს 30 წლის წინ იყო, თუ 30 დღის წინ, რადგან "არა" ყოველთვის ნიშნავს "არას" და ამ ზღვარს მე არასდროს გადავდივარ. შეხვედრებზე ორივე მხარე ვთანხმდებოდით და არ ვიცი, რატომ ამოტივტივდა ეს ამბავი ახლა, მაგრამ რაც ვიცი, ის არის, რომ ამ ქალებს თავს არ დავსხმივარ", — ამბობს მსახიობი.

ამავე თემაზე: