ჯეიმს ბონდისა და დედოფალი ელიზაბეთის განსაკუთრებული ურთიერთობის შესახებ კარგად მოგვეხსენება — ბოლოს და ბოლოს, საკუთარი თვალით ვნახეთ, როგორ გადმოხტა ვერტმფრენიდან ოლიმპიურ სტადიონზე ბრიტანეთის მონარქი აგენტ 007-თან ერთად.

ამჯერად, ელიზაბეთ II-მ ბონდის შემსრულებელ მსახიობს, დენიელ კრეიგს, ის ჯილდო გადასცა, რომელსაც გამოგონილი აგენტი ფლობს — ორდენი, რომლითაც, როგორც წესი, მხოლოდ ნამდვილი დიპლომატები და აგენტები ჯილდოვდებიან.

"კინოსა და თეატრის სამსახურში ყოფნისთვის" კრეიგი, რომელიც ხუთ ფილმში ჯეიმს ბონდს ასახიერებს, წმინდა მიქაელისა და წმინდა გიორგის ორდენით დაჯილდოვდა.

ფოტო: Metro-Goldwyn-Mayer

როგორც სამეფო ოჯახის ოფიციალური საიტიდან ვიგებთ, ორდენი, ჩვეულებრივ, უცხო ქვეყანაში შესრულებული გამორჩეული მისიისთვის გაიცემა.

იენ ფლემინგის წიგნში მხოლოდ ორჯერ ცოცხლობ (You Only Live Twice), რომელიც ჯეიმს ბონდის სერიის მე-12 ნაწილია, აგენტმა 007-მა ეს ჯილდო 1954 წელს მიიღო.

კრეიგთან ერთად, კინემატოგრაფიასა და ქველმოქმედებაში საქმიანობისთვის ბრიტანეთის იმპერიის ორდენით (CBE) დაჯილდოვდნენ ბონდის ფილმების პროდიუსერები, მაიკლ გ. უილსონი და ბარბარა ბროკოლი.