ფინანსთა სამინისტროს ინფორმაციით, დააკავეს ქვემო ქართლში მდებარე ნაგავსაყრელის თანამშრომლები, რომლებიც მარკეტებიდან ამოღებულ და გადაყრილ პროდუქტს ყიდდნენ. უწყების განცხადებით, ერთ-ერთი კერძო პირის სახლიდან ამოიღეს ბრალდებულების მხრიდან ნაგავსაყრელიდან აღებული 1 105 კგ. ხორცპროდუქტი და 115 კგ. საკონდიტრო ნაწარმი.

"გამოძიებით დადგინდა, რომ ბრალდებულები, ქვემო ქართლის ტერიტორიაზე განთავსებულ ნაგავსაყრელიდან, სისტემატურად ახდენდნენ, გასანადგურებლად განკუთვნილ, სხვადასხვა ქართული და უცხოური კომპანიების მიერ წარმოებული და ქსელური სავაჭრო მარკეტებიდან ამოღებულ, მოხმარებისთვის უვარგისი და ვადაგასული ხორცპროდუქტებისა და საკონდიტრო ნაწარმის რეალიზაციას, რის სანაცვლოდაც იღებდნენ გარკვეული ოდენობის თანხებს", — განაცხადა ფინანსთა სამინისტროს გამომძიებელმა, თეონა დევდარიანმა.

გამოძიება მიმდინარეობს სსსკ-ის 198-ე მუხლის პირველი ნაწილით, 220-ე მუხლითა და 221-ე მუხლის მეოთხე ნაწილით, რაც გულისხმობს ადამიანის სიცოცხლისათვის ან ჯანმრთელობისათვის საშიში პროდუქციის დამზადება, შემოტანა ან რეალიზაციას, უფლებამოსილების ბოროტად გამოყენებასა და კომერციულ მოსყიდვას. აღნიშნული დანაშაულები 4-დან 6 წლამდე თავისუფლების აღკვეთას ითვალისწინებს.