ალბათ, ბევრს კარგად გახსოვთ წლების წინ ტელევიზორის ეკრანებზე ნანახი ლათინურ-ამერიკული სერიალი მეამბოხე სულები, რომლის ასეულობით ეპიზოდთან ერთად არაერთი ჩვენგანი გაიზარდა.

ნეტფლიქსმა სწორედ ამ საკულტო შოუს შთაგონებით თანამედროვე ვერსია გადაიღო, რომლის ხილვსაც სულ მალე, 2022 წლის 5 იანვარს შევძლებთ.

Rebelde (მეამბოხე) — ასე ერქმევა განახლებულ სერიალს, რომლის პირველი სრული ტრეილერიც საკმაოდ დამაინტრიგებლად გამოიყურება:

ნეტფლიქსმა ახალ პროექტზე ამავე სახელწოდების მქონე ცნობილი მექსიკური სერიალის შთაგონებით იმუშავა, რომელიც 2004-2006 წლებში გადიოდა მექსიკურ სატელევიზიო არხზე.

აღსანიშნავია, რომ თავის მხრივ ეს მექსიკური სერიალი არგენტინული Rebelde Way-ის (მეამბოხე სულის) მიხედვით შეიქმნა, რომელიც უფრო ადრე, 2002 წელს გამოვიდა და საქართველოშიც სწორედ ამ ლათინურ-ამერიკულმა შოუმ მოიხვეჭა სახელი.

როგორც ჩანს, საქართველოსგან განსხვავებით, ამერიკის კონტინენტებზე უფრო პოპულარული მექსიკური ვარიანტი აღმოჩნდა და ნეტფლიქსმაც სწორედ მის მიხედვით გადაიღო უფროსკლასელი თინეიჯერების შესახებ ახალი სერიალი.

ვინ იცის, თინეიჯერული სერიალების ერთგული მაყურებლებისთვის შეიძლება ეს ახალი შოუ ფავორიტ სანახაობადაც იქცეს ან კიდევ მათ, ვისაც ბავშვობისდროინდელი მეამბოხე სულები ენატრება, ნოსტალგია ნაწილობრივ მაინც შეუმსუბუქოს.