უკვე 27 წელია, რაც ახალი წლის განუყრელ ატრიბუტებში მერაია ქერის ჰიტმა ლამის ნაძვის ხეც კი გვერდზე ჩააჩოჩა. ყოველ შემთხვევაში, 1994 წლის შემდეგ რომ ყოველი შობა და წინასაშობაო პერიოდი ამერიკელი მუსიკოსისთვის ნამდვილი დღესასწაულია, ეს დანამდვილებით ვიცით — ამას მოწმობს რეიტინგები, სადაც All I Want for Christmas Is You პირველობას არ თმობს.

ამჯერად, სადღესასწაულო კლასიკად ქცეულმა სიმღერამ უკვე რეკორდიც დაამყარა — ზედიზედ მესამედ მოექცა Billboard Hot 100-ის სათავეში.

Billboard-ის ცნობის მიხედვით, სიმღერის რეიტინგი 10 დეკემბრიდან 16 დეკემბრამდე 7 პროცენტით გაიზარდა. ამასთან, All I Want for Christmas Is You ის სიმღერაა, რომელიც ჩარტების ლიდერი ყველაზე დიდხანს, 85 კვირის განმავლობაში, იყო.

All I Want for Christmas Is You ("საშობაოდ ერთადერთი, რაც მინდა, შენ ხარ") მერაია ქერიმ 1994 წელს გამოუშვა თავის საშობაო ალბომთან ერთად. მას შემდეგ სიმღერის პოპულარობა ისე გაიზარდა, რომ პირველი საშობაო ტრეკი გახდა, რომელსაც ამერიკის ხმისჩამწერი კომპანიების ასოციაციამ (RIAA) ბრილიანტის სტატუსი მიანიჭა.