ესპანელი მსახიობი ვერონიკა ფორკე ორშაბათს, 13 დეკემბერს მადრიდში მდებარე თავის სახლში გარდაცვლილი იპოვეს.

ადგილობრივი მედიის ინფორმაციით, პოლიცია ვარაუდობს, რომ მსახიობმა სიცოცხლე თვითმკვლელობით დაასრულა.

ვერონიკა ფორკეს პირველ დეკემბერს 66 წელი შეუსრულდა.

მაყურებელი მას ყველაზე კარგად ოსკაროსანი რეჟისორის პედრო ალმოდოვარის ფილმიდან Kika იცნობს, რომელშიც შესრულებულმა როლმა ფორკეს ყველაზე გავლენიანი ესპანური კინოდაჯილდოების — გოიას ჯილდო მოუტანა.

ვერონიკა ფორკე ასევე თამაშობდა ალმოდოვარის ისეთ ფილმებში, როგორებიცაა What have I done to deserve this? და Matador. მათ შორის ამ უკანასკნელში ანტონიო ბანდერასთან ერთად, რომელიც კოლეგის გარდაცვალებას ტვიტერზე გამოეხმაურა:

"მშვიდობით, ვერონიკა ფორკე. მასთან ერთად წლების წინ ვმუშაობდი და მახსოვს, რომ ტკბილი, კეთილშობილი ქალი და კარგი კომპანიანი იყო", — წერს ბანდერასი.