ჯანდაცვის ჯერ კიდევ მოქმედი მინისტრი, ეკატერინე ტიკარაძე ამბობს, რომ მისი შემცვლელის კანდიდატურა ღირსეული იქნება. თუმცა მისი მტკიცებით, ამაზე გადაწყვეტილება ამ დრომდე არ მიუღიათ.

"კონსულტაციები მიმდინარეობს, იმ შემთხვევაში, თუ, რა თქმა უნდა, მე ამასთან დაკავშირებით მექნება ინფორმაცია, გავაკეთებ შესაბამის კომენტარს. ნებისმიერ შემთხვევაში, ვთვლი, რომ კანდიდატი იქნება ღირსეული. მნიშვნელოვანი არის, რომ მისი მხრიდანაც გადადგმული იყოს მშვიდი, დაბალანსებული ნაბიჯები, ვინაიდან, ჯანდაცვა უპირველეს ყოვლისა, და მით უმეტეს პანდემიის პირობებში, მოითხოვს ნამდვილად თანაბარი და თანმიმდევრული ნაბიჯების გადადგმას", — აღნიშნა მან.

რაც შეეხება გავრცელებულ ინფორმაციას, რომ ჯანდაცვის მინისტრობის კანდიდატად ქართული ოცნების დეპუტატი, არჩილ თალაკვაძე განიხილება, ტიკარაძე ამ ინფორმაციაზე კომენტარს არ აკეთებს. თუმცა მისი თქმით, ის, რომ თალაკვაძე ჯანდაცვის ღონისძიებას დაესწრო, გასაკვირი არაა, რადგან მისი "ბექგრაუნდი" ამ სფეროსთან არის დაკავშირებული.

"არჩილ თალაკვაძე ხშირად ესწრება ჯანდაცვის სხვადასხვა ღონისძიებას, ვინაიდან მისი ბექგრაუნდი სწორედ ჯანდაცვასთანაა დაკავშირებული, ასევე, ჰქონდა გარკვეული გამოცდილება, როცა პენიტენციურ დაწესებულებაში მუშაობდა, აქედან გამომდინარე, ამაში გასაკვირი არაფერია, თუმცა ამ ეტაპისთვის ვერაფერს ვერ გეტყვი", — თქვა ტიკარაძემ.

ეკატერინე ტიკარაძემ თანამდებობიდან წასვლის შესახებ 9 დეკემბერს განაცხადა, თუმცა ის საქმიანობას წლის ბოლომდე გააგრძელებს. მანამდე მედიაში აქტიურად ვრცელდებოდა ინფორმაცია პრემიერმინისტრ ირაკლი ღარიბაშვილსა და ეკატერინე ტიკარაძეს შორის არსებულ დაპირისპირებაზე. გავრცელებული ინფორმაციის თანახმად, დაპირისპირება იყო ბოლო საკოორდინაციო სხდომაზეც, თუმცა მოგვიანებით, ეს უარყვეს.

აღსანიშნავია, რომ ტიკარაძე მწვანე პასპორტის უვადობას არ ემხრობოდა. როგორც მან 4 დეკემბერს განაცხადა, მიუხედავად იმისა, ჯანდაცვის სამინისტრო და დაავადებთა კონტროლის ცენტრი მთავარი უწყებები არიან ამ რეკომენდაციების გაცემის მხრივ, ვერ იტყვის, რომ "სრულად იზიარებენ ამ გადაწყვეტილებას". კოვიდგადატანილებისთვის მუდმივი პასპორტი პრემიერმინისტრის რეკომენდაცია იყო. 8 ნოემბერს ღარიბაშვილმა აღნიშნა, რომ არსებობდა მოსაზრება 6-თვიან ვადაზე, თუმცა საბოლოოდ საბჭომ უვადობაზე მიდი წინადადება გაიზიარა.