პარლამენტის პირველი ვიცე-სპიკერის, გია ვოლსკის განცხადებით შეფასება, რომ ქართული ოცნება ბიუჯეტის საკუთარ თავზე მორგებას ცდილობს არაპროფესიონალურია. მისი თქმით, თუ მოსახლეობას რომელიმე პროექტი არ მოსწონს, ამაზე საკრებულოს უმრავლესობამ უნდა იმსჯელოს.

"იმდენად არაპროფესიონალურია ეს შეფასება, რას ჰქვია, ბიუჯეტი თავის თავზე როგორ უნდა მოირგოს გინდ ქართულმა ოცნებამ, გინდ ნებისმიერმა სხვამ? არსებობს პროექტი, რომელიც უნდა განხორციელდეს კონკრეტული რეგიონისთვის [...] თუ რამე ისეთი არსებობს, რომელიც მოსახლეობას არ გამოადგება, ამისთვის ჰყავს საკრებულოში უმრავლესობა, რომელსაც შეუძლია ამ საკითხებზე იმსჯელოს. მაგრამ მსჯელობის პროცესში არ უნდათ შემოსვლა", — განაცხადა მან.

გუშინ, 26 ნოემბერს ზუგდიდსა და ბათუმში საკრებულოს სხდომების პარალელურად ხმაური იყო. ოპოზიცია ძველი საკრებულოს მიერ მომავალი წლის ბიუჯეტის განხილვას აპროტესტებდა. მიუხედავად მათი პროტესტისა, ორივე ქალაქში საკრებულოების ძველმა შემადგენლობებმა 2022 წლის ბიუჯეტები დაამტკიცეს.

პარტია საქართველოსთვის პოლიტსაბჭოს წევრი და დეპუტატი მიხეილ დაუშვილი ასევე მოუწოდებდა ხელისუფლებას, არ დაემტკიცებინა მუნიციპალური ბიუჯეტები ძველი საკრებულოს პირობებში. ის ამბობდა, რომ ხელისუფლება ცდილობს, ჩვეულ სტილში, ერთპიროვნულად, ახალი საკრებულოების შეკრებამდე მიიღოს გადაწყვეტილება.

ამაზე ისაუბრა ქართული ოცნების პოლიტსაბჭოს წევრმა, სოზარ სუბარმა და განაცხადა, რომ ძველი საკრებულოების მიერ მომავალი წლის ბიუჯეტის წინასწარ დამტკიცება მათი პოლიტიკური გადაწყვეტილება იყო. მიმდინარე პროტესტის ფონზე სუბარს მიაჩნია ისიც, რომ ეს "ყველაზე სწორი" და "განვითარებაზე ორიენტირებული" გადაწყვეტილებაა.

ნაციონალური მოძრაობის წევრი, ლევან ბეჟაშვილი საკრებულოების ძველი შემადგენლობით ბიუჯეტების დამტკიცებას "ძალაუფლების მიტაცებას" უწოდებს და ამბობს, რომ ამ პროცესს აუცილებლად წაიღებენ სასამართლოებში.