ნაციონალური მოძრაობის თავმჯდომარის, ნიკა მელიას განცხადებით, კვირის ბოლოს წარადგენს გეგმას, რომელიც მათ "გამარჯვებამდე" მიიყვანთ. ამის შესახებ მელიამ ვარდების რევოლუციის წლისთავზე ცოცხალი ჯაჭვის აქციაზე ისაუბრა და აღნიშნა, რომ ახლა ყველაზე მნიშვნელოვანია "სტრატეგიული მოთმინება".

"ძალიან მნიშვნელოვანია, რომ შევთანხმდეთ იმ რამდენიმე საკითხზე, რომელზეც არსებობს ერთობა და იარსებებს. ამ წუთის მდგომარეობით, მე დარწმუნებული ვარ, რომ ერთობა არსებობს და განმტკიცდება იმ საკითხის გარშემო, რამაც ცვლილებები უნდა მოიტანოს — ეს არის ვადამდელი სრულად პროპორციული არჩევნები და ამ საკითხის გარშემო მთელი საზოგადოება გაერთიანდება", — აღნიშნა მან.

8 ნოემბრის შემდეგ, ნაციონალური მოძრაობა საპროტესტო აქციებს მართავდა. მათი მთავარი მოთხოვნა სააკაშვილის კლინიკაში გადაყვანა და მისი გათავისუფლება იყო. როგორც ენმ-ს თავმჯდომარე, ნიკა მელია ამბობდა, სანამ მათი მოთხოვნები არ შესრულდებოდა, დაშლას არ აპირებდნენ და აქციებს ყოველ დღე გამართავდნენ.

მას შემდეგ, რაც სააკაშვილი გორის სამხედრო ჰოსპიტალში გადაიყვანეს და შიმშილობა შეწყვიტა, ოპოზიციამ აქციები შეაჩერა. თუმცა მელია ამბობს, რომ "არაძალადობრივი მეთოდებით" ბრძოლა გაგრძელდება. მას არ დაუკონკრეტებია კონკრეტულად რა გეგმა აქვს ოპოზიციას, მაგრამ აღნიშნა, რომ მთავარი თავგადასავალი არის წინ და სანამ სააკაშვილი არ იქნება დახსნილი "უკანონო პატიმრობიდან" და სანამ ქართულ ოცნებას "სახელმწიფო ექნება მიტაცებული", ბრძოლას არ შეაჩერებენ.