ნილ დეგრას ტაისონი მსოფლიოში ერთ-ერთი ყველაზე ცნობილი და პოპულარული ასტროფიზიკოსია, რომელიც თავისი იუმორითაც გამოირჩევა.

გუშინ, ტაისონი ინტერნეტ ფორუმ Reddit-ზე AMA-ში ანუ "მკითხეთ რაც გინდათ" (Ask Me Anything) იყო ჩართული და ფორუმის წევრების შეკითხვებს პასუხობდა.

ერთ-ერთმა წევრმა, SpaceX-ის ბოლო მისიაზე და მეორადი Falcon 9-ის წარმატებულად გაშვებაზე საუბრისას, ტაისონს ჰკითხა წავიდოდა თუ არა ის მარსზე ილონ მასკის პროექტის ფარგლებში.

"დედამიწა ძალიან მიყვარს, შესაბმისად, თუ საკმარისი რესურსი იქნება იმისთვის, რომ უკან დამაბრუნონ, მაშინ წავალ", უპასუხა მან. თუმცა იქვე დაამატა, რომ მასკმა კიდევ ერთი პირობა უნდა შეასრულოს:

"თუ ილონ მასკი მარსზე დედამისს გაუშვებს და მერე უკან ცოცხალს და უვნებელს დააბრუნებს, მეც წავალ."

68 წლის მეი მასკი მარსზე გამგზავრებას არ აპირებს:

"არა, მარსზე გადასვლას არ ვაპირებ, იმიტომ რომ იქ უფრო ახალგაზრდა ადამიანები სჭირდებათ ან ინჟინრები და მეცნიერები, რომლებიც მომავალს შექმნიან."

ასე რომ, გამოდის, ნილ დეგრას ტაისონი მარსზე არ წავა, თუ, რა თქმა უნდა, ილონ მასკი დედამისს ძალით არ ჩატენის რაკეტაში.