ქართული ოცნების თავმჯდომარე, ირაკლი კობახიძე აცხადებს, რომ მმართველი პარტია 20-ვე მუნიციპალიტეტში იგებს. ცოტა ხნის წინ ის ამბობდა, რომ მხოლოდ 18 მუნიციპალიტეტში ლიდერობდნენ და დარჩენილი იყო 2, სადაც ოპოზიცია 50%-იან ზღვარს უახლოვდებოდა.

"შემოსულია მონაცემები ჩვენი აქტივისგან, 19:00 საათის მონაცემებით, ჩვენ ვიგებთ არჩევნებს 20-ვე მუნიციპალიტეტში. თუმცა, კიდევ ერთხელ, რჩება, დაახლოებით, 45 წუთი და ყველა ამომრჩეველს მოვუწოდებთ მაქსიმალური აქტიურობისკენ, საჭიროა ამ გამარჯვების ბოლომდე მიყვანა. ამისთვის თითოეული ხმა არის მნიშვნელოვანი", — განაცხდა კობახიძემ.

დღეს, 30 ოქტომბერს ადგილობრივი თვითმმართველობის არჩევნების მეორე ტური გაიმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.