თბილისის ზოოპარკის საზოგადოებასთან ურთიერთობის სამსახურის ინფორმაციით, 13 ივნისს ზოოპარკში შესვლა უფასო იქნება. როგორც მზია შარაშიძემ განმარტა, ეს ერთგვარი საჩუქარი იქნება იმ ადამიანებისათვის, ვინც გასულ წელს, 13 ივნისის სტიქიის დროს ზოოპარკს დაეხმარა და გვერდში დაუდგა.

შარაშიძის თქმით, 13 ივნისს ზოოპარკში სარეკლამო აქტივობაც უფასო იქნება იმ შემთხვევაში, თუ კომპანიები ზოოპარკში მისულ სტუმრებს პროდუქციას უფასოდ დაურიგებენ:

"ესეც სიმბოლურად და მადლობის ნიშნად იმისთვის, რაც ხალხმა სტიქიის დროს ერთმანეთისთვის გააკეთა".

2015 წლის 13 ივნისს, თბილისში მდინარე ვერეს ადიდების შედეგად გამოწვეულ წყალდიდობას 22 ადამიანის სიცოცხლე ემსხვერპლა. სტიქიამ გაანადგურა ზოოპარკი, ცხოველების ნაწილი გაიქცა, ნაწილმა კი წყალდიდობას თავი დააღწია.