2015 წლის ნოემბერში დაკავებული თურქი ჟურნალისტების ბრალდება, თითქოს მათ სახელმწიფო საიდუმლოება გათქვეს, ადგილობრივმა საკონსტიტუციო სასამართლომ პრესის თავისუფლების შეზღუდვად შეაფასა. დღეს, 26 თებერვალს კენ დუნდარმა და ერდემ გულმა ციხე სამთვიანი პატიმრობის შემდეგ დატოვეს. ინფორმაციას BBC ავრცელებს.

გაზეთ Cumhuriyet-ის ჟურნალისტებმა 2015 წლის ნოემბერში ანგარიში გამოაქვეყნეს, რომელშიც თურქეთი ისლამისტების იარაღით მომარაგებაში ამხილეს, ამის გამო მათ სასჯელად თავისუფლების აღკვეთა შეუფარდეს. ჟურნალისტებს ბრალი სახელმწიფო გადატრიალებაში, ჯაშუშობასა და სახელმწიფო საიდუმლოს გამჟღავნებაში დასდეს.

თურქი ჟურნალისტები 92 დღის განმავლობაში ციხეში იმყოფებოდნენ. მათი სასამართლო პროცესი 25 მარტს უნდა გამართულიყო თუმცა, საკონსტიტუციო სასამართლომ ჟურნალისტების დაკავების ფაქტი სიტყვისა და პრესის თავისუფლების შეზღუდვად მიიჩნია და დაკავებულებმა ციხე დატოვეს.

კენ დუნდარმა ციხიდან გამოსვლისას მხარდასაჭერად შეკრებილ ადამიანებს უთხრა, რომ ბრძოლას პრესის თავისუფლებისთვის იქამდე გააგრძელებს, სანამ ციხე, რომელსაც ის საკონცენტრაციო ბანაკად აღიქვამს, მუზეუმად არ გადაიქცევა:

"ეს პრესის თავისუფლების გამოცდა იყო. მიუხედავად იმისა, რომ ჩვენ თავისუფლები ვართ, ჩვენი 30 კოლეგა ჯერ კიდევ ციხეშია. იმედი მაქვს, რომ ეს გადაწყვეტილება მათაც გაუხსნის თავისუფლებისკენ მიმავალ გზას".

მთავრობის მამხილებელი მასალების გამოქვეყნების შემდეგ, ქვეყნის პრეზიდენტმა რეჯეფ თაი ერდოღანმა ჟურნალისტები სახელმწიფო ღალატში დაადანაშაულა და გაზეთის წინააღმდეგ სასამართლოში სარჩელი შეიტანა.